3
Ema Judeu
sira nia ukunfuan
1 Ikus
mai, maun alin sira, haksolok iha Na’i. Atu hakerek fali buat nebe ha’u hakerek
ona la todan mai ha’u no ba imi karik, diak liu. 2 Matan
moris ba kona ba asu sira; matan moris ba kona ba serbisu na’in aat sira; matan
moris kona ba Judeu sira. 3 Ita mak ema nebe simu
ona sirkunsisaun lo-los, basa ita serbi Maromak tuir espiritu, no ita laran
metin ba Kristu Jesus liu fali iha ita rasik nia hahalok.
4 Ha’u
rasik la kuran buat diak sira nebe ema tau sira nia laran ba. Ema balun hanoin
katak sira iha buat diak karik, ha’u mos bele hanoin liu tan! 5
Ha’u simu sirkunsisaun wainhira ha’u foin loron ualu; ha’u moris nudar
ema Israel ida, housi suku Benjamin nian. Ha’u Ebreu housi ema Ebreu. Kona ba
ukunfuan, ha’u ema fariseu ida, 6 no ha’u laran
manas tebes kona ba ukunfuan, tan ne’e mak ha’u fo susar ba Kreda. Kona ba ha’u
nudar ema los tuir ukunfuan, ema ida la bele dehan buat ruma kona ba ha’u.
7 Maibe
wainhira ha’u hetan ona Kristu, buat hotu nebe, uluk ha’u hare nudar folin
boot, ha’u hare ona nudar la folin liu. 8 Liu tan
ida ne’e, wainhira ha’u hatene ona Kristu, ha’u nia Na’i, ha’u hahu hare buat
hotu nudar folin laek. Tan Nia, ha’u husik lakon deit buat hotu, hodi hare buat
seluk hotu hanesan buat mesak foer, wainhira ha’u bele manan Kristu.
9 Ha’u hein katak ha’u bele hetan ha’u an iha Nia, maski ha’u rasik la iha
hahalok diak ka santidade nebe mai tamba halo tuir ukunfuan, maibe ho santidade
nebe mai tamba fiar iha Kristu; santidade nebe Maromak fo tamba fiar iha Kristu
Jesus.
10 Ha’u
hakarak hatene Nia; ha’u hakarak koko nia moris hi’as nia kbiit, no halo parte
iha nia terus, hodi sai hanesan Nia iha nia mate. 11 Ha’u
hein atu bele moris hi’as housi mate.
12 Ha’u
la fiar katak ha’u to’o ona iha
santidade; ha’u la hare ha’u an rasik nudar ema lo-los ona, maibe ha’u haka’as
an nafatin atu hetan Kristu Jesus, basa Nia mak halo ha’u Ninian. 13
Maun alin sira, ha’u la fiar katak ha’u ema santu ona. Ha’u dehan deit
ida ne’e: ha’u haluha buat nebe liu tiha ona, no ha’u halai maka’as ba oin atu
to’o ba rohan; 14 ha’u matan hateke ba kolen nebe
Maromak housi leten, iha Kristu Jesus, bolu ita atu buka. 15
Ita hotu nebe dehan katak ita ema lo-los ona hanoin mos hanesan ne’e;
maibe imi la hanoin hanesan ne’e karik kona ba buat ruma, Maromak sei fo hatene
nia mo-mos ba imi. 16 Ba ohin, ita kaer metin buat
nebe ita hetan ona.
17 Maun
alin sira, laran ida deit ba hodi banati tuir ha’u; hare didiak ba sira nebe
la’o tuir ita nia dalan. 18 Basa, iha ema barak
nebe moris nudar funubalun Kristu nia krus nian. Dala barak, ha’u dehan ne’e
ona ba imi, no ohin ha’u dehan dala ida tan hodi tanis: 19
sira ne’e halai maka’as ba susar boot! Sira nia maromak mak sira nia
kabun, no sira gaba an kona ba buat nebe, lo-los, halo sira mo’e. Sira hanoin
deit kona ba sasan mundu ne’e nian.
20 Mai
ita, ita nia moris lo-los mak iha lalehan; housi neba ita hein ita Na’i no
Maksoin, Jesus Kristu, nia hi’it an mai. 21 Housi
kbiit nebe iha Nia atu ukun buat hotu., Nia sei halo ita nia isin nebe folin
laek nakfila ba isin nebe hanesan Nia isin rasik, nabilan ho kmanek wa’in.
|