4

Diabu babeur Jesus

                ¹ Liu tiha ne'e, Espiritu lori Jesus ba rai fuik maran, atu demoniu babeur Nia. ² Nia hadera an iha loron haat nulu no kalan haat nulu nia laran, ikus mai Nia hamlaha. ³ Babeur na'in hakbesik ba Nia hodi dehan: “O Maromak Oan sa, haruka fatuk sira ne'e fila an ba paun.” ⁴ Jesus simu: “Hakerek tiha ona: ‘Ema la moris deit ho aihan, maibe ho liafuan sira nebe sai housi Maromak futar ibun.’” ⁵ Tuir mai demoniu lori  Nia ba sidade santa, tau Nia iha Templu tutun, ⁶ hodi dehan ba Nia: “O Maromak Oan sa, soe o nia an housi ne'e ba kraik, basa hakerek nanis ona: 'Kona ba O, Nia sei fo ordem ba  sira; sira sei tane O iha sira liman, atu o nia ain sira keta kona fatuk ruma.” ⁷ Jesus hatan ba nia: “Hakerek nanis mos ona: ‘O keta babeur Na’i o nia Maromak.’”

                ⁸ Hafoin demoniu lori Nia ba foho aas liu hodi hatudu mundu nia reinu hot-hotu ho nia gloria ba Nia, ⁹ hodi dehan ba Nia: “Buat sira ne'e hotu ha'u sei fo ba O, naran O hakneak hodi adora ha'u.” ¹⁰ Ho ida ne'e, Jesus dehan ba nia: “Sai tiha, Satanas, basa hakerek ona: 'O sei adora o nia Na’i, o nia Maromak; ba Nia deit mak o sei hanai.” ¹¹ Nune'e, diabu husik tiha Nia,  sira mai serbi ba Nia.

Jesus hanorin iha Galileia

¹² Rona tiha katak ema dadur ona Joao, Jesus ba Galileia. ¹³ Husik tiha Nazare, Nia ba fali Kafarnaum, sidade besik tasi ibun, rai Zabulaun ho Neftali nian, ¹⁴ atu sai tuir buat nebe profeta Isaias fo sai tiha ona ¹⁵ Rai Zabulaun, rai Neftali, dalan tasi nian, Jordaun sorin ba, Galileia gentiu sira nian, ¹⁶ povu nebe uluk horik iha nakukun laran hare roman boot ida; naroman mosu ba sira nebe uluk hela iha nakukun mate nian.' ¹⁷ Houri oras ne'e, Jesus hahu hanorin hodi dehan: “Imi hakribi imi sala ba, basa reinu lalehan nian besik dau-daun ona.”

Bolu eskolante sira

¹⁸ La'o dau-daun tuir tasi ibun Galileia nian, Nia hare maun alin rua; Simao, bolu katak Pedro, ho nia alin Andre. Sira soe hela dai ba tasi, basa sira ema hakaildor ikan. ¹⁹ Nia dehan ba sira: “Imi tuir Ha'u mai, Ha'u sei halo imi sai hakaildor ema nian.” ²⁰ Sira husik kedas dai hodi la'o tuir Nia.

                ²¹ La'o uitoan ba oin, Nia hare maun alin rua seluk: Tiago, Zebedeu nia oan, ho nia alin Joao. Sira hadia hela dai iha ro laran hamutuk ho sira nia aman Zebedeu. Nia bolu sira, ²² sira husik kedas ro ho sira nia aman hodi tuir Nia.

Haklaken evangeliu no fo isin diak

²³ Hafoin Nia hahu la'o lemo Galileia tomak hodi hanorin iha sinagoga sira, haklaken liafuan diak reinu nian no fo isin diak ba moras sira iha povu nia leet. ²⁴ Nia naran boot iha rai Siria tomak. Sira lori ba Nia ema sira hotu nebe terus housi buat aat no susar oi-oin, sira nebe demoniu tama iha laran, sira nebe ulun halai no sira nebe isin mate; Nia fo isin diak ba sira^{. 25} Ema lubun boot tuir Nia housi Galileia, housi Dekapoli, housi Jerusalem, housi Jordaun sorin balun ba.