KOLOSO

1

Kumprimentu

                ¹ Housi Paulo, Jesus Kristu nia apostolu tan Maromak nia hakarak, no housi ami nia alin Timoteo: ² ba Maromak nia povu iha Kolso, ami nia belun diak sira iha moris hamutuk ho Kristu: Maromak, ita Aman, haraik ba imi grasa no dame.

Ami fo agradese nafatin

                ³ Ami fo agradese nafatin ba Maromak, Na’i Jesus Kristu nia Aman, wainhira ami reza hodi hanoin imi, ⁴ basa ami rona kona ba imi nia domin ba Maromak nia povu tomak. ⁵ Wainhira lia menon lo-los, katak evangeliu to’o ba imi ba dala uluk, imi rona kona ba esperansa nebe evangeliu ne’e lori mai. Ne’e duni, imi nia fiar no domin nia hun hamriik iha buat sira nebe imi hein nebe rai hela di-diak ba imi iha lalehan. ⁶ Evangeliu ne’e lori nafatin mai bensa sira, no belar dau-daun iha mundu tomak, nudar nia belar tiha ona iha imi leet wainhira, ba dala uluk, imi rona kona ba Maromak nia grasa hodi hatene nia lo-los nudar nia duni.

⁷ Epafras, ha’u nia maluk doben iha serbisu ba Kristu, no Kristu nia emar ida iha ha’u nia fatin, nebe hanoin imi, ⁸ halo ha’u hanoin fali imi nia domin mai ha’u iha espiritu. ⁹ Tan ne’e, housi loron nebe ami simu liafuan kona ba imi, ami harohan nafatin ba Maromak tan imi, atu imi bele hatene lo-los buat nebe Nia hakarak housi presente matenek nian hotu no housi neon hatene nian, ¹⁰ atu imi nia moris iha Maromak futar oin monu lo-los ba nia laran, hodi fo fuan iha hahalok diak hotu no sai boot ba iha matenek kona ba Maromak. ¹¹ Hetan kbiit ba ho Maromak nia kbiit tomak nebe Maromak haraik ba imi iha nia gloria; metin to’o rohan iha ksolok. ¹² Fo agradese nafatin ba Aman nebe hadia ita atu simu ita nia parte iha liman rohan santu sira nian iha reinu naroman. ¹³ Nia hasai ita housi nakukun nia kbiit no lori ita ba nia Oan doben nia reinu. ¹⁴ Iha Nia mak ita hetan maksoin no perdua ba ita nia sala.

Kristu mak buat hot-hotu nia hun

¹⁵ Nia mak ilas Maromak nian nebe matan la hare; Nia mak Oan boot liu sasan hot-hotu nian; ¹⁶ basa iha Nia mak Maromak hakiak buat hot-hotu; buat nebe matan hare no buat nebe matan la hare: liurai nia kadunan, ukun Na’in, Na’i ulun, kbiit--; buat hotu ne’e mosu housi Nia no tamba Nia. ¹⁷ Nia mak uluk liu sasan hot-hotu,  no buat hotu bele hela deit iha Nia. ¹⁸ Nia mak ulun isin lolon tomak nian, katak Kreda. Nia mak hun, no Nia mak Ida nebe moris hi’as uluk  housi mate, atu sai uluk liu iha buat hot-hotu.

¹⁹ Basa Maromak hakarak duni atu halo Nia nakonu lo-los ho diak, ²⁰ no housi Nia, Maromak hakarak hadame buat hot-hotu ho Nia An; no housi Nia, tamba ran nebe Nia fakar iha krus, Maromak hametin dame iha rai nudar iha lalehan.

²¹ Uluk imi rasik dook housi Maromak no moris hasouru Nia tamba imi nia hahalok aat sira, ²² maibe ohin imi hadame malu ona ho Nia. Maromak hadame imi ho Nia An hodi saran Kristu nia isin lolon ba mate, atu imi bele sai ema sala laek, santu, no mos iha Nia futar oin, ²³ naran imi laran metin iha imi nia fiar, laran metin mos iha esperansa iha evangeliu nebe imi rona ona, nebe haklaken ona ba sasan hotu iha lalehan okos, nebe ha’u, Paulo, sai tiha nia emar.

²⁴ Ohin ha’u haksolok wainhira ha’u terus tamba imi; ha’u halo los iha ha’u nia isin lolon buat nebe sei kuran hela ba Kristu nia terus tan nia isin, katak Kreda. ²⁵ Basa ha’u serbi Kreda, basa Maromak saran tiha mai ha’u knaar ida atu hala’o nia hakarak kona ba Kreda. ²⁶ Ha’u koalia kona ba planu nebe ema nia hanoin la bele to’o, nebe housi otas ba otas, rai subar hela, no nebe ohin Maromak fo sai tiha ba nia santu sira.

²⁷ Maromak hakarak fo hatene ba sira ne’e Nia planu rikusoi no gloria nian, nebe ema nia hanoin la bele to’o, nebe rai hela ba gentiu sira: katak Kristu rasik nebe hela iha imi leet mak esperansa Maromak nia gloria nian.

²⁸ Ne’e mak buat nebe  ami haklaken. Ami fo sai no hanorin ba ema hotu matenek lo-los, hodi hakarak katak ema hotu bele sai ema lo-los iha Kristu. ²⁹ Tan ne’e mak ha’u serbisu no haka’as an ho Kristu nia kbiit nebe moris maka’as iha ha’u laran.