2

¹ Husik ha’u dehan ba imi oin sa ha’u serbisu maka’as ba imi no ba sira iha rai Laodiseia no ba sira seluk nebe la hatene ha’u. ² Ha’u halo ne’e atu sira bele hetan aten berani no bele halibur hamutuk iha domin, nune’e sira bele laran metin teb-tebes tan matenek no hatene lo-los Maromak nia misteriu, katak Kristu; ³ iha Nia mak subar hela matenek nia rikusoi tomak.

⁴ Ne’e duni, ha’u dehan ba imi atu imi la bele husik ema ruma lohi imi ho lia bosok, maski sira hatene koalia ho lia midar. ⁵ Basa maski ha’u la iha ho ha’u nia isin lolon, ha’u hela hamutuk ho imi iha ha’u neon, hodi haksolok tan hare imi laran ida deit no laran metin iha imi nia fiar iha Kristu.

Moris lo-los iha Kristu

⁶ Tamba imi simu ona Kristu Jesus nudar Na’i, haka’as an atu moris iha Nia. ⁷ Halo imi nia abut naruk iha Nia; harii imi nia moris iha Nia, no sai maka’as liu tan iha imi nia fiar, nudar ema hanorin imi. Fo agradese nafatin ba.

⁸ Hare ba katak ema ida la halo imi sai atan hodi lohi imi ho liafuan nebe mai housi  matenek ema nian, no housi neon sira nebe ukun mundu ne’e, la’os housi Kristu. ⁹ Basa Maromak nia An tomak hela iha Kristu, nudar ema, ¹⁰ no imi simu ona moris lo-los tomak hamutuk ho Nia nebe liu kbiit na’in no ukun na’in sira hotu.

¹¹ Iha Kristu mak imi simu sirkunsisaun, la’os sirkunsisaun nebe ema mak halo, maibe sirkunsisaun nebe Kristu rasik mak halo, katak Kristu hasai imi housi ema maksalak nia ukun. ¹² Basa wainhira imi simu baptismu, imi hakoi tiha ona hamutuk ho Kristu, no iha baptismu mak imi moris hi’as tamba imi nia fiar iha Maromak nia kbiit nebe maka’as, nebe halo Nia moris hi’as housi mate. ¹³ Uluk, imi mate iha imi nia klamar tamba imi nia sala, no tamba imi gentiu nebe ukunfuan la iha. Maibe Maromak lori ona imi ba moris hamutuk ho Kristu. Maromak kasu tiha ita nia sala tomak. ¹⁴ Nia kasu tiha naran foer ita nia lisan nian housi ukunfuan nebe kesi ita, hodi halakon nia tomak wainhira Nia hedi nia iha krus. ¹⁵ Iha krus ne’e, Kristu hasai nia housi kbiit na’in no na’i ulun sira nia ukun; Nia hamoe sira hodi halo sira sai dadur na’in wainhira Nia manan sira.

¹⁶ Ne’e duni, keta husik ema ruma halo ukunfuan sira kona ba buat nebe imi han ka hemu, eh kona ba loron boot sira eh festa fulan foun nian eh kona ba Sabadu. ¹⁷ Buat hirak ne’e hotu mak ilas deit sasan aban bainrua nian. Ida nebe lo-los mak Kristu. ¹⁸ Keta husik ema nebe dehan katak nia hare dook ba buat oi-oin eh hanorin atu haraik an hodi bosok, eh atu adora anju sira, lohi imi. Ema ne’e loko an deit tamba nia hanorin nudar ema deit, ¹⁹ hodi husik ona Kristu, isin lolon nia ulun. Iha Kristu, nia ulun, mak isin lolon tomak simu ai-han, no nia liman-ain hela hamutuk hodi sai boot nudar Maromak hakarak.

Mate no moris iha Kristu

²⁰ Imi mate ona ho Kristu no imi sai ona housi mundu ne’e nia kbiit no Na’i ulun sira nia ukun. Ne’e duni, tansa imi sei moris hanesan imi mundu ne’e nian? Tansa imi halo tuir ukunfuan sira hanesan ²¹ "Keta han ida ne’e, keta koko ida neba, keta kona ida neba"?  ²² Buat hirak ne’e hotu bele lakon deit tan ema toman ona, tuir ema nia ukunfuan no hanorin. ²³ Sira ne’e mak ukunfuan nebe husu ema nia matenek, ema nia laran metin, laran haraik an no ukun an iha isin, maibe sira hotu folin la iha; sira ne’e ba isin nia ksolok deit.