3

Lisan sarani

           ¹ Imi moris hi’as ona karik hamutuk ho Kristu, ne’e duni imi buka buat nebe leten nian; iha nebe Kristu tur iha Maromak nia sorin kuana; ² imi sei hanoin kona ba buat nebe leten nian, la’os kona ba sasan rai ne’e nian.  ³ Imi mate ona, no imi nia moris subar hela hamutuk ho Kristu iha Maromak. ⁴ Wainhira Kristu, ita nia moris, mosu mai, imi mos sei mosu ho kmanek wa’in hamutuk ho Nia.

Hadook an housi lisan aat

                  ⁵ Ne’e duni, imi sei oho hakarak rai ne’e nian nebe book imi nia laran, hanesan sala foer, hanoin foer, hakarak foer, laran aat, laran karakten, nebe hanesan adora lulik, ⁶ tan sira ne’e mak Maromak nia laran nakali tun ba ema laran tos nia oan sira. ⁷ Uluk imi mos la’o tuir dalan ne’e wainhira imi moris iha sira laran. ⁸ Maibe ohin, imi sei halakon sira ne’e hotu: hirus, hakarak aat, laran nakali, laran aat, lia bosok kona ba ema, eh lia foer. ⁹ Keta lohi malu; tan imi hasai tiha housi imi an rasik ema tuan ho nia hahalok aat sira ¹⁰ no tau fali ema foun, nebe hafoun an nafatin atu nia bele to’o ba matenek lo-los tuir Maromak nia ilas. ¹¹ Iha Maromak la iha ema Gregu eh Judeu, ema nebe simu sirkunsisaun eh ema nebe la simu sirkunsisaun, barbaru eh ema housi rai Seta, atan eh la atan, maibe Kristu deit, nebe hotu no iha ema hotu.

¹² Nudar ema sira nebe Maromak fihir ona, nebe santu no Maromak hadomi, tau laran luak, laran kmaus, haraik an, laran sadia no pasiensia nudar imi nia hatais. ¹³ Simu malu di-diak, tahan malu wainhira imi iha buat ruma hasouru ema seluk. Imi sei perdua malu nudar Na’i fo perdua ona ba imi. ¹⁴ Iha sira ne’e hotu nia leten, tau tan domin nebe kesi metin sira seluk atu sai buat furak ida deit. ¹⁵ Husik Kristu nia dame ukun imi nia fuan, basa tan ne’e mak Maromak bolu imi nudar liman-ain isin lolon ida deit nian. Fo agradese nafatin.

      ¹⁶ Halo Kristu nia lia menon iha nia rikusoi tomak hela iha imi laran. Hanorin malu ba, fo liafuan diak ba malu ho matenek tomak, no fo agradese nafatin, hananu salmu no knananuk ho laran ba Maromak; ¹⁷ keta halo buat ruma eh dehan buat ruma la hodi Na’i Jesus nia naran, hodi fo agradese ba Aman Maromak housi Nia.

Moris sarani iha uma laran

                   ¹⁸ Feto sira, halo tuir imi nia laen nia hakarak hanesan iha Na’i. ¹⁹ Mane sira, hadomi imi nia kaben no hare nia ho laran kmaus. ²⁰ Oan sira, halo tuir nafatin imi aman-inan sira nia hakarak: basa buat ida ne’e monu los ba Maromak nia laran. ²¹ Aman-inan sira keta halo imi nia oan sira laran todan keta sira lakon esperansa. ²² Atan sira, halo tuir iha buat hotu imi nia na’i mundu ne’e nian nia hakarak, la’os tamba ema hare imi hanesan ema nebe buka deit atu fo ksolok ba ema, maibe ho laran diak tamba imi hamtauk Maromak. ²³ Buat hotu nebe imi halo, halo ho laran hanesan imi halo tuir Maromak nia hakarak, la’os ema nia hakarak, ²⁴ hodi hanoin katak imi sei simu liman rohan nudar imi nia kolen housi Na’i; basa imi serbi dau-daun Kristu, ita Na’i. ²⁵ Ida nebe halo buat aat sei simu buat aat, basa Na’i la fihir ema.