I  TESALONIA

1

                ¹ Housi Paulo, Silas no Timoteo, ba kreda Tesalonika nian, nebe Aman Maromak no Na’i Jesus Kristu nian: Grasa no dame hela ho imi.

Ema Tesalonika nia moris no fiar

                ² Ami fo agradese nafatin tamba imi hotu no temi imi naran nafatin iha ami nia hamulak. ³ Basa ami hanoin iha Maromak no Aman nia futar oin sa imi moris imi nia fiar, oin sa imi nia domin halo imi serbisu maka’as, no oin sa imi nia esperansa iha ita Na’i Jesus Kristu metin teb-tebes. ⁴ Maun alin sira, ami hatene katak Maromak hadomi imi no hili imi atu sai Maromak nian rasik. ⁵ Basa ami lori liafuan diak ba imi, la’os deit liafuan housi ibun tutun, maibe ho kbiit no ho Espiritu Santu, hodi hatene lo-los katak liafuan ne’e los duni. Imi hatene oin sa ami moris wainhira ami sei hela ho imi; moris ne’e ba imi rasik nia diak. ⁶ Imi banati tuir ami no Na’i; maski imi hetan terus barak, imi simu lia menon ne’e ho ksolok nebe mai housi Espiritu Santu. ⁷ Nune’e, imi sai esemplu ida ba sarani sira hotu iha Masedonia no Akaia. ⁸ La’os deit liafuan diak kona ba Na’i mak to’o ba Masedonia no Akaia tomak housi imi, maibe mos liafuan kona ba imi nia fiar iha Maromak to’o ona ba fatin hot-hotu. Ne’e duni, ami la bele dehan tan buat ruma. ⁹ Ema sira neba koalia kona ba oin sa imi simu ami wainhira ami ba hare imi, no oin sa imi husik ona lulik sira atu fila ba Maromak, atu serbi Maromak los no moris hodi hein nia Oan atu mai fali housi lalehan; nia Oan Jesus nebe Maromak halo moris hi’as housi mate no nebe hasai ita housi Maromak nia laran nakali nebe atu mai.