2

Paulo nia serbisu iha Tesalonika   

                ¹ Maun alin sira, imi rasik hatene katak ami nia visita ba imi la leet deit. ² Imi hatene oin sa ema halo aat no hasara ami iha Filipe, molok ami ba hare imi iha Tesalonika. No maski iha babeur barak, ita nia Maromak fo aten berani mai ami atu hato’o ba imi liafuan diak nebe mai housi Nia. ³ Liafuan nebe ami hato’o ba imi la mai housi hanorin nebe sala eh housi laran la los, eh laran atu lohi ema. ⁴ Ami koalia nafatin nudar Maromak hakarak, basa Nia hanoin katak ami soi atu simu knaar liafuan diak nian. Ami la buka atu monu los ba ema nia laran, maibe ba Maromak nian deit nebe koko ami nia laran. ⁵ Imi hatene di-diak katak ami la mosu ba imi ho lia midar, ka koalia ho liafuan sira nebe atu taka subar ami nia hakarak aat. Maromak mak ami nia sasin. ⁶ Ami la haka’as an atu buka naran boot housi ema, housi imi ka ema seluk, maski nudar Kristu nia apostolu ami bele husu buat ruma housi imi. ⁷ Maibe ami laran kmaus wainhira ami iha imi leet, hanesan inan ida nebe tau matan ba nia oan sira. ⁸ Tamba  ami hadomi imi, ami hakarak hato’o ba imi, la’os deit liafuan foun diak, maibe ami nia moris rasik. Imi folin boot tebes mai ami! ⁹ Maun alin sira, imi la haluha oin sa ami serbisu no haka’as an. Ami serbisu kalan loron atu ami la bele fo todan ba imi wainhira ami haklaken ba imi liafuan diak housi Maromak.

                ¹⁰ Imi no mos Maromak mak ami nia sasin katak ami nia hahalok ba imi fiarna’in sira los, mos no sala laek. ¹¹ Imi hatene katak ami hare imi ida-ida hanesan aman ida hare nia oan sira.¹² Ami fo aten berani ba imi; ami fo ksolok ba imi iha susar laran; ami haka’as fila-fila atu moris nudar Maromak hakarak; Maromak nebe bolu imi atu moris hamutuk ho Nia iha nia reinu no gloria.

                ¹³ Iha tan buat  ida nebe halo ami fo agradese nafatin ba Maromak: wainhira ami hato’o liafuan diak ba imi, imi rona no simu nia, la’os nudar ema nia liafuan, maibe nudar Maromak nia liafuan, nebe serbisu iha ema sira nebe fiar. ¹⁴ Maun alin sira: buat nebe mosu ba Maromak nia kreda sira iha Judeia, ba ema sira iha neba nebe Kristu Jesus nian, buat hirak ne’e mosu mos ba imi. Imi mos terus housi imi maluk sira nia liman todan hanesan sira housi ema Judeu sira, ¹⁵ nebe oho Na’i Jesus no Profeta sira no fo todan mai ami. Sira la fo ksolok ba Maromak; sira hare ema hot-hotu ho laran dodok. ¹⁶ Sira ne’e haka’as an atu la bele husik ami haklaken liafuan foun nebe lori sira ba maksoin. Ho ida ne’e, sira halo nakonu lo-los sira sala nia sukat. Ohin Maromak nia laran nakali mai dau-daun no besik ona atu fo todan ba sira.

Paulo hakarak hare sira dala ida tan.

                ¹⁷ Ami fali, maun alin sira, wainhira ami haketak an housi imi ba tempu uitoan--tebes duni, la’os iha ami nia neon, maibe iha isin lolon deit--ami hanoin imi teb-tebes no ami haka’as an atu hare imi dala ida tan! ¹⁸ Ami hakarak fila fali iha imi leet. Ha’u rasik buka fila fila, la’os dala ida deit; maibe Satanas la husik ha’u. ¹⁹ Lo-los, imi la kuran liu ema seluk, imi mak ami nia esperansa, ami nia ksolok no buat nebe halo ami gaba an katak ami manan ona iha Na’i nia futar oin wainhira Nia fila hikas mai. ²⁰ Tebes duni, ami gaba an no haksolok tamba imi.