3

Timoteo atu hametin sarani sira

                ¹ Ikus mai, ami la bele tahan tan. Ami hanoin hodi kbiit atu hela mesa-mesak iha Atena, ² hodi haruka Timoteo, ami nia alin nebe serbisu hamutuk ho ami ba Maromak atu haklaken liafuan diak kona ba Kristu. Ami haruka nia atu hametin imi hodi tulun imi nia fiar, ³ atu nune’e, imi ida la bele fila kotuk tamba susar sira ne’e. Imi rasik hatene katak susar sira ne’e halo parte iha Maromak nia hakarak kona ba imi. ⁴ Basa wainhira ami hela dau-daun hamutuk ho imi, ami fo hatene nanis ona katak ami sei hetan susar housi ema; imi hatene lo-los katak buat hirak ne’e mosu duni. ⁵ Ha’u la bele tahan tan, tan ne’e ha’u haruka Timoteo, atu ha’u bele hatene lo-los kona ba imi nia fiar. Keta diabu babeur tiha imi karik hodi halo leet deit serbisu hotu nebe ami halo.

                ⁶ Ohin, Timoteo fila fali ona mai, no nia lori mai ami liafuan diak tebes kona ba imi nia fiar no domin. Nia fo hatene mai ami katak imi hanoin diak nafatin kona ba ami, no imi hakarak hare ami nudar ami hakarak hare imi. ⁷ Nune’e, iha ami nia susar no terus hotu ne’e, ami hetan laran ksolok tamba imi, maun alin sira. Imi nia fiar mak fo laran ksolok ne’e mai ami, ⁸ basa ami moris lo-los wainhira ami laran metin iha imi nia moris hamutuk ho Na’i. ⁹ Ohin, ami fo agradese ba Na’i tamba imi; ¹⁰ kalan loron ami husu Nia ho laran tomak atu husik ami hare imi ho matan rasik hodi halo los buat nebe imi sei kuran ba imi nia fiar.

                ¹¹ Maromak no Aman rasik, no ita Na’i Jesus Kristu, hadia dalan mai ami atu ba to’o imi! ¹² Na’i halo boot liu tan imi nia domin ba malu no ba ema hot-hotu, hanesan ami hadomi imi. ¹³ Nune’e Nia sei hametin imi nia fuan atu sai los no santu iha Maromak no Aman nia futar oin, wainhira ita Na’i Jesus fila hikas mai hamutuk ho santu sira hotu.