5

Imi naroman nia oan

                ¹ Imi la hein atu ami hakerek ba imi, maun alin sira, kona ba “tempu no loron", ² basa imi hatene lo-los katak Na’i nia loron sei mosu mai hanesan na’okten iha kalan. ³ Wainhira ema dehan “Loron sira ne’e hakmatek no iha dame" mak teki-teki buat aat sira mosu, hanesan feto nebe atu tur ahi; no ema ida la bele halai housi nia.

                ⁴ Maibe imi la moris iha nakukun laran, maun alin sira, atu loron ne’e toman imi hanesan na’okten ida. ⁵ Lae, imi hotu naroman nia oan no loron nia oan; ita la’os kalan nian ka nakukun nian, ⁶ tan ne’e, ita la bele toba dukur nudar ema seluk, maibe matan moris no oin mos. ⁷ Kalan mak tempu ba sira nebe dukur atu toba no ba lanuten sira atu sai lanu, ⁸ maibe ita loron nian no ita sei oin mos; ita tau fiar nudar ita nia hatais besi funu nian, no esperansa kona ba maksoin atu taka ita nia ulun. ⁹ Maromak lakohi katak ita simu kastigu, maibe atu ita manan maksoin housi ita Na’i Jesus Kristu, ¹⁰ nebe mate tamba ita atu, ita moris ka mate, ita bele moris hamutuk ho Nia. ¹¹ Ne’e duni, fo aten berani ba malu, hametin malu nudar imi halo dau-daun ona.

                ¹² Ami husu imi, maun alin sira, atu hanoin sira nebe serbisu iha imi leet no iha imi nia leten iha Na’i nudar imi nia mestre. ¹³ Hare sira hodi hamtauk tebes no hadomi sira tan sira nia serbisu.

                ¹⁴ Iha imi nia leet, imi hotu moris iha dame laran. ¹⁵ No ami husu ida ne’e housi imi, maun alin sira; si’ak sira nebe halimar deit; fo aten berani ba sira nebe tauk; tau matan ba sira nebe kbiit laek, no pasiensia ba ema hotu. ¹⁵ Hare katak ema la buka selu aat ho aat; imi sei hanoin buat nebe diak liu ba malu no ba komunidade tomak. ¹⁶ Haksolok nafatin; ¹⁷ hamulak bei-beik; ¹⁸ no tamba buat hotu, fo agradese ba Maromak, basa ne’e mak buat nebe Maromak hein housi imi atu halo iha Kristu Jesus.

                ¹⁹ Keta halo mate Espiritu, ²⁰ eh despresa profesia; ²¹ koko buat hotu uluk lae, hafoin mak rai hela buat nebe diak;  ²² laran metin ba buat nebe diak, no hadook an housi buat hotu nebe aat.

                ²³ Maromak dame nian halo imi ema lo-los no santu; no bali imi ho isin diak no sala laek, espiritu, klamar no isin, ba ita Na’i Jesus Kristu nia hiit an mai. ²⁴ Maromak bolu tiha imi no Nia sei la husik imi leet deit.

                ²⁵ Harohan mai ami, ha’u maun alin sira.

                ²⁶ Kumprimenta maun alin sira hotu ho rei santu nian. ²⁷ Iha Na’i nia naran,ha’u husu imi atu lee surat ne’e ba maun alin sira hotu.

²⁸ Ita Na’i Jesus Kristu nia grasa hela ho imi.