2

Keta husik ema lohi imi

                ¹ Kona ba ita Na’i Jesus Kristu nia hiit An mai, maun alin sira, no ita nia halibur malu ho Nia, ² imi keta laran taridu lalais eh tauk tamba “espiritu” ka boatos ruma ka surat ruma nebe, ema dehan, housi ami, katak Na’i nia loron to’o ona mai. ³ Keta husik ema bosok imi nune’e, basa loron ne’e sei la mosu molok funu boot mai uluk no funubalun boot, ida nebe nia destinu mak atu lakon, mosu tiha mai. ⁴ Nia mak funubalun nebe dehan katak nia boot liu fali buat nebe ema bolu 'maromak', boot liu fali buat hotu nebe ema adora; tan ne’e nia hatur nia an iha Maromak nia santuariu hodi dehan katak Nia Maromak. ⁵ Tebes, imi sei hanoin hetan katak ha’u hateten ona ba imi kona ba ida ne’e wainhira ha’u sei hela ho imi. ⁶ No imi hatene mos sa ida mak tahan nia atu nia la bele mosu molok nia tempu. ⁷ Misteriu ukunfuan laek nian serbisu dau-daun ona, maibe ida nebe tahan nia, tahan nia ba tempu ohin ne’e deit to’o ema hasai tiha nia. ⁸ Iha tempu neba, ida nebe ukunfuan la iha  mosu. Na’i oho nia hodi hu’u iis housi nia ibun no sei halo nia kbiit laek wainhira Nia hiit An mai ho kmanek  wa’in.

                ⁹ Funubalun boot ne’e sei mosu mai tan Satanas nia hahalok ho kbiit tomak, ho sinal no hahalok oi-oin, ¹⁰ no ho buat aat hotu nebe bele lohi sira nebe atu lakon duni tan sira lakohi hadomi lialos hodi hetan maksoin. ¹¹ Maromak halo sira hanoin maka’as atu sira fiar lia bosok ¹² atu sira hotu nebe lakohi fiar lialos maibe hili fali buat aat hetan kastigu.

Laran metin iha fiar

                ¹³ Maibe ita ten ke fo agradese nafatin ba Maromak tamba imi, maun alin sira nebe Na’i hadomi, basa Maromak fihir imi houri uluk kedas atu hetan maksoin housi Espiritu nebe halo imi sai santu no housi fiar iha lialos. ¹⁴ Housi evangeliu nebe ami lori, Nia bolu imi ba ida ne’e atu imi bele simu ita Na’i Jesus Kristu nia gloria. ¹⁵ Ne’e duni, laran metin ba, maun alin sira, no kaer metin lisan nebe, ho liafuan housi ami nia ibun eh housi surat, ami hanorin tiha ba imi.

¹⁶ Ita Na’i Jesus Kristu rasik, no Maromak, ita Aman, nebe hadomi ita no haraik tiha mai ita ksolok rohan laek no esperansa lo-los housi grasa, ¹⁷ fo ksolok ba imi nia fuan no hametin imi iha buat hotu nebe imi halo eh dehan.