3

Na’i sei bali imi housi aat

                ¹ Ikus mai, maun alin sira, harohan mai ami; atu Na’i nia lia menon belar lalais hodi manan, no ema simu nia ho hamtauk nudar imi simu nia; ² no atu ita bele dook housi ema aat no ema karakten nia hahalok, basa la’os ema hotu fiarna’in. ³ Maibe Na’i laran los, no Nia sei haraik kbiit ba imi hodi bali imi housi buat aat; ⁴ no ami fiar iha Na’i katak imi halo tuir ona no sei halo tuir buat hotu nebe ami haruka imi. ⁵ Na’i lori imi nia fuan atu hadomi Maromak no laran metin ba Kristu.

Ema ida-ida halo serbisu

                ⁶ Iha Na’i Jesus Kristu nia naran, ami haruka imi, maun alin sira, atu hadook an housi maun alin sira nebe lakohi serbisu eh atu moris tuir lisan nebe ami hato’o ona ba imi.

                ⁷ Imi hatene ona oin sa imi sei banati tuir ami; wainhira ami sei hela ho imi, ami la halimar deit, ⁸ wainhira ami han iha ema nia meja, ami selu; maibe ami serbisu kalan loron, hodi kosar metan no haka’as an, atu ami la bele fo todan ba ema ruma. ⁹ Ne’e la’os tamba ami la iha direitu, maibe atu ami bele sai esemplu ida nebe imi bele banati tuir. ¹⁰ Wainhira ami sei hela ho imi, ami fo ukunfuan ida ba imi: ema ruma lakohi serbisu karik,  keta fo han ba nia. ¹¹ Ohin ami rona katak iha ema iha imi leet nebe moris hodi halimar deit; la halo serbisu ruma maibe book ema seluk. ¹² Iha Na’i Jesus Kristu, ami haruka no bolu ema sira ne’e atu serbisu nonok hodi manan sira nia ai-han.

                ¹³ Maun alin sira, keta kole halo hahalok nebe los. ¹⁴ Ema ruma lakohi halo tuir buat nebe ami hakerek iha surat ida ne’e karik, tau matan ba nia no keta la’o hamutuk ho nia, atu nia moe; ¹⁵ maibe keta hare nia nudar funubalun ida; hare nia nudar maun alin nebe presisa ema atu korige nia.

                ¹⁶ Na’i dame nian rasik haraik dame ba imi iha tempu hot-hotu no iha dalan oi-oin. Na’i hela ho imi.

                ¹⁷ Ha’u, Paulo, hakerek lia fuan kumprimentu nian sira ne’e ho ha’u nia liman rasik. Ne’e mak sinal nebe hatudu iha ha’u nia surat hot-hotu katak nia mai duni housi ha’u; ha’u hakerek nune’e. ¹⁸ Na’i Jesus Kristu nia grasa hela ho imi hotu.