2

Harohan ba ema hot-hotu nia diak

                ¹ Uluk knanain, ha’u husu atu o harohan ba ema hot-hotu nia diak, hodi husu, hamulak no fo agradese: ² ba liurai no na’i ulun sira, atu ita bele moris hakmatek no iha dame, hodi hamtauk Maromak no moris nudar ema. ³ Harohan hanesan ne’e monu los ba Maromak, ita Maksoin, nia laran. ⁴ Nia hakarak katak ema hotu hetan maksoin no simu matenek kona ba lialos. ⁵ Tamba iha Maromak mesak ida deit, no iha Maromak no ema hotu sira leet iha lia na’in ida deit. Nia mos ema: Kristu Jesus, ⁶ nebe saran an atu soi ema hotu. ⁷ Nia mak lia sasin nebe Maromak haruka mai iha tempu lo-los, no Maromak foti ha’u  nudar nia manu ain no apostolu, no, ha’u dehan lialos no la bosok ida, nudar mestre fiar no lialos nian ba gentiu sira.

                ⁸ Ne’e duni, iha fatin hot-hotu ha’u hakarak halo ema tomak atu foti sira nia liman hodi harohan ho laran, la hodi hirus eh haksesuk malu.

Feto sira

                ⁹ Nune’e mos, ha’u dehan ba feto sira atu hatais lo-los, hodi hatene tau matan ba sira an, la halo sira nia fuuk atu dada ema nia matan, la tau osan mean eh fatuk murak eh hatais nebe folin boot; sira sei hafurak sira an ¹⁰ ho hahalok diak oi-oin nebe los ba feto sira nebe hadomi Maromak. ¹¹ Wainhira sarani sira halibur malu atu resa, feto nonok no hatudu laran nebe hamtauk ema. ¹² Ha’u la husik feto ida atu hanorin ka ukun mane. Feto sei nonok, ¹³ basa Maromak halo uluk Adao no tuir mai, Eva; ¹⁴ no diabu babeur la’os Adao, maibe feto no nia monu ba sala. ¹⁵ Maibe, hodi hetan oan mak nia sei soi an, naran nia moris ho laran mos no metin iha fiar, domin no santidade.