4

Mestre bosok sira

                ¹ Espiritu dehan mo-mos katak aban bainrua ema balun sei husik fiar hodi rona espiritu bosok sira no diabu nia hanorin; ² housi lia bosok ema laran makerek nian, ema laran aat: ³ sira ne’e hanorin katak la bele kaben, no sira bandu aihan nebe Maromak hakiak tiha atu ema hotu nebe fiar no hatene lialos bele simu ho laran agradese nian.⁴ Buat hotu nebe Maromak hakiak diak; la iha aihan nebe ema la bele han, naran ema fo agradese tamba nia: ⁵ basa Maromak nia liafuan no ema nia hamulak sei halo aihan ne’e santu. ⁶ O hanorin ne’e karik ba ita nia maun alin sira, o sei sai Kristu Jesus nia atan diak no o sei hatudu katak o hatene lo-los doutrina fiar nian no doutrina diak nebe o halo tuir tiha. ⁷ Keta lakon tempu ho doutrina bosok no dadolin folin laek. Hametin liu tan o nia espiritu. ⁸ Hahalok atu halo o nia isin maka’as diak, maibe hahalok atu hametin o nia espiritu diak liu tan, basa hahalok sira ne’e lori mai kmanek ba moris iha ne’e nian no mos ba moris rohan laek. ⁹ Ne’e liafuan nebe o bele fiar, no ema ida la bele heli nia. ¹¹ Ita nia haka’as an no halo funu tamba ita iha esperansa iha Maromak moris; no Nia ema hotu nia Maksoin, maibe liu-liu fiarna’in sira nian. ¹¹ O sei hametin doutrina ne’e  wainhira o hanorin.

                ¹² Keta husik ema la respeita o tamba deit o sei foinsa’e, maibe sai esemplu diak ba fiarna’in sira hotu iha o nia liafuan, o nia hahalok, iha o nia domin, o nia fiar, no ho o nia laran mos. ¹³  Lee eskritura ba ema sira, haklaken no hanorin to’o  tempu nebe ha’u to’o. ¹⁴ O simu ona kmanek espiritu nian wainhira hodi profeta sira nia liafuan, katuas sira tau liman ba o; keta husik kmanek ne’e leet deit. ¹⁵ Halo di-diak o nia knaar kona, saran o nian tomak ba nia, atu ema hotu bele hare oin sa o la’o ba oin. ¹⁶ Tau matan di-diak ba buat nebe o halo no hanorin; halo ne’e nafatin, nune’e o sei soi o nia an no mos sira hotu nebe rona o.