6

Atan sira

                ¹ Atan sira hotu sei hamtauk sira nia na’in, atu nune’e ema la bele koalia aat kona ba Maromak nia naran no ita nia hanorin. ² Atan sira nebe sira nia na’in sarani la bele hare sira aat liu tan tamba deit sira maun alin; lo-los, sira sei serbi sira nia na’in diak liu tan basa sira nebe hetan diak mak ema fiarna’in no Maromak nia doben sira.

Mestre lo-los no mestre bosok sira

                Hanorin buat hirak ne’e hodi haka’as sira. ³ Ema nebe hanorin buat seluk no la laran metin ba doutrina lo-los, katak ita Na’i Jesus Kristu nian, doutrina nebe tuir religiaun lo-los, ⁴ ema ne’e beikten no loko an hodi hakarak husu buat hotu no haksesuk malu kona ba liafuan sira. Housi ne’e, laran moras, istori malu, hasara malu, no la fiar malu sei mosu mai; ⁵ sei mosu mos haksesuk malu nebe la hotu housi ema sira nebe hanoin la los, la hatene lo-los buat ida no ema sira nebe hanoin katak religiaun mak dalan diak atu hetan moris diak. ⁶ Religiaun lori duni mai moris diak, maibe ba sira deit nebe laran haksolok ho buat nebe sira iha ona. ⁷ Ita la lori buat ida mai mundu ne’e, no ita sei la lori sai buat ida housi nia; ⁸ maibe wainhira ita iha aihan no hatais, ita haksolok ona ho sira ne’e. ⁹ Ema nebe hakarak sai riku hetan babeur barak; sira hetan sira an ho hakarak beik no perigosu oi-oin, nebe nei-neik sei lori sira ba susar boot no todan. ¹⁰ Domin ba osan mak buat aat hotu nia hun:; iha ema balun nebe, tan tuir nia, husik ona fiar lo-los hodi fo ba sira nia klamar kanek boot oi-oin.

Hanoin fali Timoteo nia vokasaun

                ¹¹ Maibe o, nudar ema nebe saran tiha an ba Maromak, sei hewai hotu ne’e. O sei haka’as an atu sai santu no hamtauk Maromak, nakonu ho fiar no domin, ho pasiensia barak no laran kmaus. ¹² Halo di-diak funu fiar nian hodi manan moris rohan laek ba o nia an; laran metin ba moris rohan laek nebe Maromak bolu o wainhira o hateten sai o nia fiar hodi koalia lo-los kona ba lialos iha sasin barak sira oin. ¹³ Ohin, iha Maromak nia futar oin, nebe buat moris hotu nia hun, no iha Jesus Kristu nebe koalia lo-los nudar sasin kona ba lialos ba Poncio Pilatos, ha’u saran ba o knaar atu ¹⁴ halo buat hotu nebe ha’u haruka o, la ho sala ruma eh buat ruma kuran, to’o tempu nebe ita Na’i Jesus Kristu mosu hikas mai, ¹⁵ nebe Maromak sei fo hatene sai iha tempu lo-los; Maromak nebe kmanek wa’in no buat hot-hotu nia Na’i mesak, Liurai liurai sira nian no Na’i na’i sira hotu nian; ¹⁶ Nia mesak mak la mate; nia uma hela iha naroman rohan laek; ema seidauk hare ka bele hare; naran boot no kbiit rohan laek ba Nia. Amen.

Sarani riku sira

                ¹⁷ Fo hatene sai ba sira nebe riku ho sasan mundu ne’e nian atu la bele hare la diak ema seluk sira; sira keta tau sira nia esperansa iha osan, nebe ema la bele fiar, maibe iha Maromak, nebe, housi nia rikusoi, fo mai ita buat hotu nebe ita kuran atu moris haksolok. ¹⁸ Dehan ba sira atu halo hahalok diak no sai riku ho hahalok diak, atu sai laran luak hodi hakarak fahe sira nia sasan ho ema seluk; ¹⁹ nune’e, sira bele hetan moris nebe mesak mak lo-los, hodi rai hela rikusoi barak ba aban bainrua nian.

Liafuan ikus

                ²⁰ Ha’u nia doben Timoteo, hare di-diak buat hotu nebe ami tau iha o nia liman. Keta lakon tempu hodi haksesuk malu kona ba hanorin nebe folin laek no doutrina kona ba "matenek" nebe la’os matenek lo-los; ²¹ hodi simu sira ne’e, ema balun lakon tiha sira nia fiar. Grasa hela ho o.