II TIMOTEO
1
Kumprimentu no agradese
1 Housi
Paulo, Kristu Jesus nia apostolu tan Maromak nia hakarak, tuir promessa kona ba
moris iha Kristu Jesus, 2 ba Timoteo, ha’u nia oan
doben: grasa, laran luak no dame housi Aman Maromak no housi Kristu Jesus, ita
Na’i.
3 Kalan
loron ha’u fo agradese ba Maromak, nebe ha’u serbi ho laran mos nudar ita nia
bei-ala sira halo, wainhira ha’u hanoin o iha ha’u nia orasaun. Ha’u hanoin o
nia mataben, 4 no ha’u hakarak teb-tebes atu hare o
dala ida tan. Ha’u hanoin o nia fiar nebe los: 5 fiar
nebe hetan uluk iha o nia avo feto Luisa, no iha o nia inan Eunice, no ha’u
hatene lo-los katak fiar ne’e mos iha o.
Presente nebe Timoteo simu tiha ona
6 Tan
ne’e, ha’u dehan fali ba o atu halo moris hanesan ahi lakan presente nebe
Maromak haraik ona ba o iha tempu nebe ha’u tau liman ba o. 7
Maromak nia presente ne’e la’os ema taukten nia neon, maibe espiritu
kbiit, domin no ukun an nian. 8 Ne’e duni, o la
bele moe wainhira o fo sasin kona ba ita Na’i, eh moe kona ba ha’u, Jesus nia
dadur na’in; maibe hamutuk ho ha’u, o bele tahan terus no susar tamba
evangeliu, hodi fiar deit kbiit Maromak nian, 9nebe soi ita no bolu
ita atu sai santu; la’os tamba buat nebe ita rasik halo, maibe tamba Nia
hakarak rasik no tamba nia grasa. Grasa ida ne’e fo tiha ona mai ita, iha
Kristu Jesus, molok tempu hahu, 10 maibe foin mak
fo hatene sai housi ita Maksoin, Kristu Jesus, nia hiit an mai. 11
Nia sobu rahun mate, hodi haklaken moris rohan laek housi Evangeliu; no
Maromak foti ha’u atu sai nia manu ain, nia apostolu no mestre.
12 Tamba
buat sira ne’e mak ha’u hetan susar; maibe ha’u la moe, basa ha’u hatene Ida
nebe ha’u fiar, no ha’u hatene lo-los katak Nia bele tau matan ba buat hotu
nebe Nia saran mai ha’u to’o loron neba.
13 Hare
nudar doutrina los liafuan sira nebe o rona housi ha’u, iha fiar no domin nebe
iha Kristu Jesus. 14 Tau matan di-diak ba lialos
nebe Espiritu Santu saran ba o; Espiritu nebe horik iha ita.
15 O
hatene ona katak Figelo no Hermogene no sira hotu seluk housi Asia husik tiha
ha’u. 16 Ha’u hein katak Na’i sei hatudu nia laran diak
ba Onesiforo nia familia tomak, basa nia fo ksolok nafatin mai ha’u no la moe
kona ba ha’u nia korente sira. 17 La’os deit ida
ne’e: wainhira nia to’o Roma, nia buka ha’u teb-tebes hodi hetan ha’u. 18
Na’i hatudu nia laran luak ba nia iha loron neba. O hatene lo-los oin sa
nia fo tulun mai ha’u iha Efeso.
|