2
Oin sa Timoteo sei ba hasouru susar sira
1 Ha’u
nia oan, sai maka’as iha grasa nebe iha Kristu Jesus. 2 Buat
hotu nebe o rona housi ha’u iha ema sasin sira nia oin; hato’o nia ba ema nebe
ita bele fiar atu sira mos bele hanorin ema seluk. 3 Simu
mos o nia susar, nudar Kristu Jesus nia funu na’in diak ida. 4
Funu na’in ida la buka moris nudar ema bai-bain, basa nia hakarak halo
kontenti ida nebe bolu Nia; 5 eh hare ida nebe
halimar; ema ne’e la tuir karik jogu nia regulamentu, nia la bele simu kolen; 6
eh ida tan: ema nebe serbisu iha to’os mak bele simu to’os nia folin
molok sira seluk. 7 Hanoin di-diak buat nebe ha’u
dehan ne’e, basa Na’i sei halo o hatene
lo-los lia hirak ne’e.
8 Hanoin
fali Evangeliu nebe ha’u fo sai: “Jesus Kristu moris hi’as ona housi mate, Nia
mai housi uma-kain David;” 9 tan ne’e mak ha’u
hetan susar sira ne’e, to’o tan kesi metin ho korente hanesan ema aat ida;
maibe ema sira la bele kesi metin Evangeliu. 10 Tan
ne’e, ha’u tahan hotu tamba sira hotu nebe Maromak fihir ona, atu nune’e, sira
bele hetan maksoin nebe iha Kristu Jesus no moris rohan laek nebe la’o hamutuk
ho maksoin ne’e. 11 O bele kaer metin liafuan hirak
ne’e: Ita mate hamutuk ho Nia karik, ita sei moris hamutuk ho Nia; 12
Ita metin ba Nia, ita sei ukun hamutuk ho Nia; Ita hewai Nia karik, Nia
mos sei hewai ita; 13 ita laran la metin ba Nia
karik, maibe Nia laran metin nafatin, basa Nia la bele hewai An.
Mestre bosok sira
14
Halo sira hanoin fali ida ne’e, hodi fo hatene ba
sira iha Maromak nia naran katak la bele haksesuk malu kona ba liafuan sira:
buat ne’e lori deit susar ba sira nebe rona. 15 Halo
buat hot-hotu atu hamriik iha Maromak futar oin nudar ema nebe susar oi-oin
koko ona, no nudar ema nebe la bele moe kona ba nia hahalok sira iha nia moris
tomak, maibe tuir nafatin dalan los ho lia menon lialos nian. 16
Keta lakon tempu hodi haksesuk malu kona ba filosofia; sira ne’e lori
deit ema dook liu housi religiaun lo-los, 17 no
sira nia liafuan belar daet hanesan kanek aat boot ida; iha sira leet mak
Himeneo no Fileto, 18 nebe la’o dook kedas housi
lialos hodi hateten katak matebian sira moris hi’as ona. Sira ne’e halo ema
balun nia fiar namlele hela.
19 Maibe,
Maromak nia aliserse hamriik metin, ho sinal ida ne’e: "Na’i hatene lo-los
sira nebe Na’i nian" no "Sira hotu nebe bolu Na’i nia naran hadook an
housi sala ba."
20 Iha
uma boot ida, bikan sira la’os osan mean eh osan mutin nian deit; iha mos bikan
ai eh rai nian; iha bikan balun ba festa boot no balun ba loron bai-bain. 21
Ema hamos nia an housi buat nebe bai-bain nian karik, nia sei halo an
hanesan bikan ba loron festa nian, saran tiha ba Na’i atu usa, hodi hadia an ba
hahalok diak sira.
22 Keta
husik o nia hakarak foinsa’e nian ukun o, maibe buka moris lo-los, iha fiar,
iha domin no dame, iha unidade ho sira hotu nebe bolu Na’i nia naran ho laran
mos. 23 Hadook an housi haksesuk malu nebe folin
laek, hodi hatene lo-los katak sira ne’e lori deit ema atu istori malu; 24
no Na’i nia atan la istori malu, maibe nia laran kmaus ba ema hot-hotu,
mestre diak ida, ho pasiensia barak. 25 Nia sei
laran kmaus wainhira nia korige ema nebe la fiar buat nebe nia hateten, hodi la
haluha katak Na’i bele halo sira nakfila sira nia hanoin atu sira bele simu
lialos hodi 26 hanoin lo-los ona wainhira sira sai
housi fatin nebe diabu kaer sira no halo sira nia atan.
|