2

Oin sa Timoteo sei ba hasouru susar sira

                ¹ Ha’u nia oan, sai maka’as iha grasa nebe iha Kristu Jesus. ² Buat hotu nebe o rona housi ha’u iha ema sasin sira nia oin; hato’o nia ba ema nebe ita bele fiar atu sira mos bele hanorin ema seluk. ³ Simu mos o nia susar, nudar Kristu Jesus nia funu na’in diak ida. ⁴ Funu na’in ida la buka moris nudar ema bai-bain, basa nia hakarak halo kontenti ida nebe bolu Nia; ⁵ eh hare ida nebe halimar; ema ne’e la tuir karik jogu nia regulamentu, nia la bele simu kolen; ⁶ eh ida tan: ema nebe serbisu iha to’os mak bele simu to’os nia folin molok sira seluk. ⁷ Hanoin di-diak buat nebe ha’u dehan ne’e, basa Na’i sei  halo o hatene lo-los lia hirak ne’e.

                ⁸ Hanoin fali Evangeliu nebe ha’u fo sai: “Jesus Kristu moris hi’as ona housi mate, Nia mai housi uma-kain David;” ⁹ tan ne’e mak ha’u hetan susar sira ne’e, to’o tan kesi metin ho korente hanesan ema aat ida; maibe ema sira la bele kesi metin Evangeliu. ¹⁰ Tan ne’e, ha’u tahan hotu tamba sira hotu nebe Maromak fihir ona, atu nune’e, sira bele hetan maksoin nebe iha Kristu Jesus no moris rohan laek nebe la’o hamutuk ho maksoin ne’e. ¹¹ O bele kaer metin liafuan hirak ne’e: Ita mate hamutuk ho Nia karik, ita sei moris hamutuk ho Nia; ¹² Ita metin ba Nia, ita sei ukun hamutuk ho Nia; Ita hewai Nia karik, Nia mos sei hewai ita; ¹³ ita laran la metin ba Nia karik, maibe Nia laran metin nafatin, basa Nia la bele hewai An.

Mestre bosok sira

                ¹⁴ Halo sira hanoin fali ida ne’e, hodi fo hatene ba sira iha Maromak nia naran katak la bele haksesuk malu kona ba liafuan sira: buat ne’e lori deit susar ba sira nebe rona. ¹⁵ Halo buat hot-hotu atu hamriik iha Maromak futar oin nudar ema nebe susar oi-oin koko ona, no nudar ema nebe la bele moe kona ba nia hahalok sira iha nia moris tomak, maibe tuir nafatin dalan los ho lia menon lialos nian. ¹⁶ Keta lakon tempu hodi haksesuk malu kona ba filosofia; sira ne’e lori deit ema dook liu housi religiaun lo-los, ¹⁷ no sira nia liafuan belar daet hanesan kanek aat boot ida; iha sira leet mak Himeneo no Fileto, ¹⁸ nebe la’o dook kedas housi lialos hodi hateten katak matebian sira moris hi’as ona. Sira ne’e halo ema balun nia fiar namlele hela.

                ¹⁹ Maibe, Maromak nia aliserse hamriik metin, ho sinal ida ne’e: "Na’i hatene lo-los sira nebe Na’i nian" no "Sira hotu nebe bolu Na’i nia naran hadook an housi sala ba."

                ²⁰ Iha uma boot ida, bikan sira la’os osan mean eh osan mutin nian deit; iha mos bikan ai eh rai nian; iha bikan balun ba festa boot no balun ba loron bai-bain. ²¹ Ema hamos nia an housi buat nebe bai-bain nian karik, nia sei halo an hanesan bikan ba loron festa nian, saran tiha ba Na’i atu usa, hodi hadia an ba hahalok diak sira.

                ²² Keta husik o nia hakarak foinsa’e nian ukun o, maibe buka moris lo-los, iha fiar, iha domin no dame, iha unidade ho sira hotu nebe bolu Na’i nia naran ho laran mos. ²³ Hadook an housi haksesuk malu nebe folin laek, hodi hatene lo-los katak sira ne’e lori deit ema atu istori malu; ²⁴ no Na’i nia atan la istori malu, maibe nia laran kmaus ba ema hot-hotu, mestre diak ida, ho pasiensia barak. ²⁵ Nia sei laran kmaus wainhira nia korige ema nebe la fiar buat nebe nia hateten, hodi la haluha katak Na’i bele halo sira nakfila sira nia hanoin atu sira bele simu lialos hodi ²⁶ hanoin lo-los ona wainhira sira sai housi fatin nebe diabu kaer sira no halo sira nia atan.