3

Loron ikus nia susar sira

                ¹ O bele komprende katak iha loron ikus sira, susar barak sei mosu mai.² Ema sei hanoin deit sira an hodi buka osan; loko an, no foti an; abusador; sira sei refila sira nia aman inan sira, la hatene fo agradese, la hatene Maromak; ³ la hatene sadia maluk no laran nakali, konta ema nia vida, la tuir ukunfuan, fuik no buat diak hotu nia funubalun, ⁴ traidor, bulak tan loko an, hodi hakarak deit buka sira rasik nia ksolok liu fali hadomi Maromak. ⁵ Sira sei halo hahalok diak religiaun nian iha liur, maibe iha laran sira sei hewai religiaun nia kbiit lo-los. O hadook an housi ema sira hanesan ne’e.

                ⁶ Iha sira leet mak ema sira nebe tama nei-neik iha familia sira hodi buka atu lohi feto beik sira nebe tan hanoin sira nia sala, tuir lisan foun sira nebe mosu; ⁷ hodi rona lalais ema naran deit, maibe sei la hetan matenek lialos nian. ⁸ Hanesan Janes no Jambres hasouru Moises, sira ne’e hasouru lialos; sira nia hanoin dodok no sira nia fiar folin laek. ⁹ Maibe sira la bele tahan kleur; hanesan sira na’in rua ne’e, ema hot-hotu hatene ona sira nia hahalok beik sira.

                ¹⁰ O hatene ona buat nebe ha’u hanorin, ha’u moris, buat nebe ha’u haka’as an atu manan iha moris; ha’u nia fiar, ha’u nia pasiensia, ha’u nia domin; ha’u nia laran metin, ¹¹ no susar no terus nebe ha’u hetan iha rai Antiokia, Ikonio no Listra; susar hotu nebe ha’u tahan; maibe housi sira ne’e hotu   soi tiha ha’u. ¹² Ne’e duni, ema nebe buka atu moris santu iha Kristu Jesus sei hetan susar, ¹³ maibe ema aat no bosokten sira sei la’o housi aat ba aat liu, hodi bosok ema seluk no mos sira nia an.

                ¹⁴ O fali, laran metin ba buat nebe o hatene ona no buat nebe o fiar nudar lialos; hodi hatene di-diak se mak o nia mestre ne’e, ¹⁵ no oin sa, houri kiik kedas, o hatene Sagrada Eskritura, nebe hanorin atu hetan maksoin housi fiar iha Kristu Jesus. ¹⁶ Maromak leno Eskritura hotu; nia diak atu hanorin, atu halakon hanorin nebe la los, atu sai matadalan ba ema nia moris, no atu hanorin sira sai santu. ¹⁷ Nune’e mak ema Maromak nian bele hetan kbiit no hadia an ba hahalok diak sira.