4

Lia menon boot ida

                ¹ Iha Maromak no iha Kristu Jesus nia futar oin, nebe sei tesi lia ba ema moris no ema mate, ha’u saran ba o knaar ida ne’e, hodi hanoin nia hiit An mai no nia reinu: haklaken lia menon ne’e; iha tempu los no iha tempu a los, hato’o nia ba sira. ² Halakon hanorin bosok ba, korige buat nebe sala, bolu ema atu halo tuir; maibe halo hotu ne’e ho pasiensia no hodi hanoin atu hanorin. ³ Tempu sei mai duni wainhira ema sei la haksolok ho hanorin lo-los; maibe sei buka tuir liafuan nar-naran deit hodi halibur hamutuk ba sira an mestre sira tuir sira rasik nia hakarak; ⁴ tuir mai, lakohi rona lialos, sira sei buka aiknanoik sira. ⁵ Hare di-diak katak o tuir dalan los; aten berani ba iha susar laran, halo knaar atu haklaken Evangeliu, kaer di-diak o nia knaar.

Paulo iha nia moris nia rohan

                ⁶ Kona ba ha’u, ha’u nia moris fakar dau-daun ona nudar sakrifisiu tua nian, no tempu to’o ona atu ha’u husik rai ne’e. ⁷ Ha’u halo tiha funu di-diak to’o rohan; ha’u halai tiha to’o rohan, ha’u laran metin iha fiar: ⁸ ha’u hein deit kolen justisa nian nebe rai hela mai ha’u, nebe Na’i, lia na’in justisa nian, sei haraik mai ha’u iha loron neba; no la’os deit mai ha’u maibe mos ba sira hotu nebe kaan Na’i nia hiit an mai.

Lia menon ikus nian

                ⁹ Haka’as an tebes atu mai hare ha’u lalais.¹⁰ Demas husik tiha ha’u tan domin ba mundu ne’e, no ba tiha ona ba Tesalonika; Crescente ba tiha rai Galasia, no Tito ba rai Dalmasia. ¹¹ Lucas deit mak hela ho ha’u. Halo Marcos mai ho o; ha’u hetan nia nudar tulun diak ba ha’u nia serbisu. ¹² Ha’u haruka ona Tiquico ba Efeso. ¹³ Wainhira o mai, lori mos unuk nebe ha’u husik ho Carpo iha Troas, no livru sira, liu-liu sira nebe hakerek iha bibi kulit leten. ¹⁴ Alexandre, badaen besi mean, halo aat barak mai ha’u; Maromak sei selu nia ba buat nebe nia halo. ¹⁵ O rasik matan moris kona ba nia, basa nia hasouru maka’as buat hotu nebe ita hateten.

                ¹⁶ Wainhira ba dala uluk ha’u fo lia sasin atu tahan ha’u an, la iha ema seluk nebe fo sasin hodi tulun ha’u. Sira ida-ida husik tiha ha’u; Maromak keta fo sala ba sira! ¹⁷ Maibe Na’i hamriik metin ho ha’u hodi fo kbiit mai ha’u, nune’e housi ha’u, lia menon tomak bele to’o ba gentiu sira hotu nia tilun; nune’e Maromak hasai ha’u housi leaun nia ibun. ¹⁸ Na’i sei hasai ha’u housi buat aat hotu nebe ema hakarak halo mai ha’u; Nia sei lori ha’u ba nia reinu lalehan. Ba Nia gloria nafatin ba nafatin. Amen.

Liafuan ikus

                ¹⁹ Kumprimentu ba Prisca no Aquila, no ba Onesiforo nia familia. ²⁰ Erasto hela iha Korinto, no ha’u husik Trofimo moras iha Mileto. ²¹ Haka’as an atu mai molok rai sai malirin.

                Kumprimentu ba o housi Eubulo, Pudente, Lino, Claudia no maun alin sira hotu.

                ²² Na’i hela ho o nia espiritu. Grasa hela ho o.