TITO

1

Kumprimentu

                ¹ Housi Paulo, Maromak nia atan, Jesus Kristu nia apostolu atu lori ba fiar sira nebe Maromak fihir ona no atu fo hatene ba sira doutrina lialos nian nebe tuir Maromak, ² no fo ba sira esperansa moris rohan laek nian nebe Maromak hakotu ona houri uluk kedas. Nia la bosok, ³ tan ne’e, iha tempu nebe Nia hakarak, Nia fo hatene nia laran, no tan liafuan housi Maromak, ita Maksoin, liu housi knaar nebe ha’u simu atu haklaken. ⁴ Ba Tito, ha’u nia oan lo-los iha fiar nebe ita hotu simu, grasa no dame housi Aman Maromak no housi Kristu Jesus, ita Na’i.                                                                                                                                       

Katuas sira                                                                                                                                                                                  

                ⁵ Ha’u husik o iha Kreta atu o bele halo los buat hotu nebe sei kuran iha neba, hodi foti katuas sira iha rai ida-ida, nudar ha’u dehan ba o. ⁶ Katuas ida-ida sei sai ema ida ho komportamento diak; nia hola feto dala ida deit, nia oan sira  hotu sarani ona, la’os badiu,  no ema la bele foti liafuan aat ruma hasouru sira tan sira nia hahalok aat. ⁷ Basa, nudar na’i ulun, katuas ne’e sei sai Maromak  nia saseluk; ema la bele hare buat aat ruma iha nia; nia la’os ema loko an eh si’akten; la lanuten eh baku ema; la buka osan. ⁸ Nia sei sai ema nebe hatene simu maluk sira, belun ba buat hotu nebe diak, haraik an, laran los, santu no hatene ukun an. Nia halo buat nebe nia hakotu; ⁹ nia hatene lo-los doutrina atu nia bele koalia tuir doutrina lo-los no hatan lo-los ba sira nebe koalia hasouru doutrina ne’e.

Hasouru mestre bosok sira

                ¹⁰ Tebes duni, iha imi nia leet, iha ema barak nebe la dun ukun an; sira koalia nar-naran deit hodi buka lori ema seluk atu tuir sira nia hanorin; ema sira ne’e mai liu-liu housi sira nebe hakarak hala’o sirkunsisaun. ¹¹ Halo sira nonok; ema sira ne’e halo aat uma-kain tomak, hodi hanorin buat nebe sira la bele hanorin; sira halo ne’e hodi hanoin deit atu buka osan. ¹² Sira ne’e ida, sira nia profeta ida, dehan: “Ema Kreta sira hotu mesa bosokten, balada fuik no barukten.” ¹³ Liafuan ne’e los duni. Ne’e duni, o koalia maka’as ba sira, atu sira la’o tuir dalan los iha fiar, ¹⁴ nune’e sira la fiar tan lia bosok Judeu sira nian eh ema sira nia ukunfuan nebe ba hasouru lialos. ¹⁵ Ba sira hotu nebe laran mos, buat hot-hotu mesak mos, maibe ba sira nebe laran foer no sira nebe la fiar, la iha buat ida nebe mos, basa sira nia hanoin no sira nia laran foer ona. ¹⁶ Sira ne’e dehan katak sira hatene Maromak, maibe sira la fiar Nia; sira ba hasouru Maromak nia hakarak no la bele halo buat diak ida.