2

Lisan diak sarani sira nian

                ¹ O fali,  koalia didiak tuir doutrina nebe los. ² Husu katuas sira atu hatene han hemu la resin, hodi moris tuir sira nia otas; hatene ukun an no laran metin iha fiar, iha domin no iha pasiensia. ³ Nune’e mos, ferik sira sei moris nudar ema nebe hamtauk Maromak; sira la bele konta ema nia vida, la lanuten, maibe sai mestra diak ba, ⁴ atu sira bele hanorin feto foinsa’e sira atu hadomi sira nia kaben no sira nia oan sira, ⁵ atu sai matenek no laran los, hatene serbisu, laran diak, halo tuir sira laen nia hakarak; nune’e ema la bele hateten aat Maromak nia liafuan . ⁶ Nune’e mos kona ba mane foinsa’e sira: hanorin sira atu hatene ukun an. ⁷ Iha buat hotu, o hatudu an nudar esemplu hahalok diak sira nian: wainhira o hanorin, hanorin lo-los iha doutrina no ho laran manas, ⁸ ho liafuan diak no los, atu funubalun sira hotu sai bilan deit, hodi la dehan buat aat ruma hasouru ita. ⁹ Hanorin atan sira atu halo tuir sira na’i nia hakarak, hodi halo buat hotu nebe sira haruka, la’os hodi koalia barak, maibe hodi fo ksolok ba sira; ¹⁰ la’os hodi bosok sira nia na’i, maibe hodi hatudu laran los iha buat hotu-hotu, nune’e Maromak, ita Maksoin nia doutrina bele hetan naran diak.            

Moris sarani nia hun

¹¹ Basa, Maromak nia grasa mosu ona, hodi lori maksoin ba ema tomak, ¹² no hanorin ita buat hotu nebe ita sei halo atu husik buat hotu nebe la lori ba Maromak, no mos husik tiha hakarak aat mundu ne’e nian hotu. Ita sei ukun an hodi moris diak no hamtauk Maromak iha mundu ne’e, ¹³ hodi hein dau-daun Maromak no ita Na’i Jesus Kristu nia gloria. ¹⁴ Nia saran an ba mate tamba ita atu hasai ita housi ita nia laran aat no hamos povu ida ba Nia An rasik; povu nebe hakarak halo buat nebe diak deit. ¹⁵ Dehan lia hirak ne’e wainhira o hanorin eh wainhira o halo los hanorin nebe la los: o bele halo ne’e ho kbiit tomak. Keta husik ema hare o hanesan kbiit laek.