3
Lia menon seluk tan
1
Halo sira hanoin katak sira iha knaar atu hamtauk
liurai no Na’i ulun sira; sarani sira halo tuir sira nia haruka; sira sei hadia
an nafatin atu halo hahalok diak; 2 sira la bele
halo aat ema nia naran, la buka istori malu, maibe laran diak no hatudu laran
kmaus ba ema hotu. 3 Basa uluk ita mos beik, ulun tos, la’o dalan sala; hakarak aat oi-oin
ukun ita, ita moris ho laran aat no laran hirus; odi malu no mos hirus ita an
rasik. 4 Maibe wainhira Maromak, ita Maksoin nia
laran diak no domin mosu ona mai, 5 la’os tamba Nia
hare buat diak ruma iha ita, maibe tamba deit Nia laran luak, mak Nia soi ita
hodi be moris hi’as nian nebe hamos ita no hafoun ita ho Espiritu Santu, 6
nebe Nia fakar ho laran luak housi Jesus Kristu, ita Maksoin. 7
Nia halo ne’e atu ita bele sai los iha Maromak futar oin tan Nia grasa,
atu sai liman rohan na’in nebe hein atu simu moris rohan laek. 8
O bele fiar ho laran metin doutrina ida ne’e, no ha’u hakarak katak o
maka’as wainhira o hanorin buat hirak ne’e atu sira hotu nebe fiar Maromak
haka’as an atu halo deit hahalok diak sira. Buat sira ne’e hotu mesa diak, no
sei halo diak deit ba ema tomak.
Liafuan ba Tito rasik
9
Hado’ok an housi doutrina mamuk sira no liafuan
sira kona ba bei-ala sira, no haksesuk malu kona ba ukunfuan, basa sira ne’e
hotu mesa folin laek. 10 Kona ba ema nebe la’o la
los, wainhira o halos tiha nia dala ida eh dala rua, hado’ok an ona housi nia. 11
Hatene ba katak ema hanesan ne’e lakon ona no tesi lia ona hasouru nia an
rasik nudar ema maksalak ida.
12 Wainhira
ha’u haruka tiha ona ba o Artemas ka Tiquico, o mai lalais atu hela ho ha’u iha
Nikopoli. Ha’u hanoin atu hela neba iha tempu rai malirin nian. 13
Hare ba kona ba buat hotu nebe advogadu Zenas no ba Apolo sei kuran
wainhira sira la’o dalan, keta sira hetan susar. 14 Ema
hotu sei hanorin an atu serbisu mos ba sira nia moris loron loron nian; sira la
bele halimar deit.
15
Sira hotu nebe hela ho ha’u haruka sira nia kumprimentu. Kumprimentu mos
ba sira hotu nebe hadomi ami iha fiar.
Grasa ba imi hotu.
FILEMON
Introdusaun
1 Housi
Paulo, dadur na’in ida tamba Jesus Kristu, no housi ita nia alin Timoteo, ba
ami nia maluk doben iha serbisu, Filemon, 2 no ba Kreda
nebe halibur iha o nia uma, no ba ami nia feto Apia, no mos ba ami nia maluk
funu na’in Arquipo: 3 Maromak, ita Aman, no Na’i
Jesus Kristu haraik ba imi grasa no dame.
Filemon nia domin no fiar
4 Maluk
doben Filemon, ha’u fo agradese nafatin ba Maromak wainhira ha’u hanoin o iha
ha’u nia orasaun, 5 basa ha’u rona kona ba o nia
domin ba Maromak nia povu no kona ba o nia fiar iha Na’i Jesus. 6
Ha’u resa katak ita nia domin ba malu bele halo o hatene liu tan kona ba
bensa hotu nebe ita hetan iha moris hamutuk ho Kristu. 7 O
nia domin, alin doben, lori ksolok boot no laran moris mai ha’u! O halo Maromak
nia povu haksolok teb-tebes.
Favor kona ba Onesimo
8 Tan
ne’e maski ha’u aten berani nudar o nia maun iha Kristu atu haruka o atu halo
buat ruma nebe kuran atu halo, 9 maibe tamba ha’u
hadomi o mak ha’u husu de’it. Ha’u halo ne’e maski ha’u mak Paulo, Kristu Jesus
nia saseluk, no ohin dadur na’in tamba Nia. 10 Ha’u
husu o favor ida ne’e kona ba Onesimo, ha’u nia oan iha Kristu; iha dadur laran
ha’u sai tiha nia klamar nia aman. 11 Uluk, nia
folin la iha ba o, maibe ohin, nia folin boot ona ba o no mai ha’u. 12
Ohin, ha’u haruka nia fila fali ba o no ha’u nia fuan la’o hamutuk ho
nia. 13 Bele karik, ha’u hakarak katak nia hela
hamutuk ho ha’u iha ne’e, nebe dadur hela tamba evangeliu, atu nia tulun ha’u
iha o nia fatin. 14 Maibe ha’u lakohi obriga o atu
tulun ha’u; ha’u hakarak katak o tulun ha’u ho o rasik nia hakarak. Ha’u sei
book de’it ho o nia laran luak.
15 Ba
tempu uitoan, Onesimo haketak an housi o, maibe ne’e atu o bele simu nia ba
nafatin karik, 16 la’os tan nudar atan ida maibe
nudar o nia alin doben ona iha Kristu. Nia folin boot duni mai ha’u no nia sei
sai folin boot mos ba o, iha isin no
mos iha Na’i!
17 Ne’e
duni, o hanoin ha’u nudar o nia maluk ida karik, simu nia ba nudar o simu ha’u
rasik. 18 Nia halo aat ruma eh iha tusan ba o
karik, sisi nia tusan mai ha’u. 19 Ha’u, Paulo,
hakerek surat ne’e ho ha’u nia liman rasik: ha’u sei selu fali o. Tebes duni,
ha’u la kuran atu fo hatene fali ba o katak o mos iha tusan boot mai ha’u, o
nia moris rasik. 20 Ne’e duni, ha’u nia alin, halo
favor ida ne’e mai ha’u tamba Na’i; fo ksolok mai ha’u iha Kristu!
21 Ha’u
hatene lolos katak, nudar ha’u hakerek, o sei halo buat nebe ha’u husu--lolos,
o sei halo liu tan. 22 Ohin mos, hadia fatin ida
mai ha’u, basa ha’u hein katak Maromak sei rona imi nia hamulak no sei haraik
ha’u fali ba imi.
Liafuan ikus nian
23
Epafras, nebe hela iha dadur laran hamutuk ho ha’u tamba Kristu, haruka
nia kumprimento ba o; 24 nune’e mos ha’u nia maluk
iha serbisu: Marcos, Aristarco, Demas, no Lucas. 25 Na’i
Jesus Kristu nia grasa hela ho imi hotu.
|