EBREU

1

¹ Iha tempu uluk no ho dalan oi-oin, Maromak koalia ba ita nia bei-ala sira housi profeta sira; ² ikus mai iha loron hirak ne’e, Nia koalia mai ita housi Oan Mane nebe Nia halo nudar liman rohan na’in ba buat hotu, no housi Nia Maromak halo mundu tomak, ³ Nia mak Maromak nia gloria nabilan; Maromak nia ilas lo-los, nebe tahan buat hotu iha mundu ne’e ho nia liafuan maka’as. Wainhira Nia hamos tiha ona buat hotu housi sala, Nia hatodan an iha Maromak nia kuana iha leten aas, ⁴ boot liu anju sira, basa naran nebe Nia simu nudar liman rohan  kmanek liu anju sira nian.

Jesus nudar Liurai

                ⁵ Basa, ba anju ida nebe mak Maromak dehan: “O ha’u nia oan mane; ohin ha’u hahoris o”? No mos, “Ha’u sei sai Aman ba Nia; no Nia sei sai Oan mai Ha’u?” ⁶ No dala ida tan, wainhira Nia iha oan boot sira nia oin, Nia dehan: “Maromak nia anju sira hotu adora Nia ba.” ⁷ Kona ba anju sira, Nia dehan, “Nia halo nia anju sira sai hanesan anin no nia emar sira hanesan ahi nebe lakan maka’as.” ⁸ Maibe kona ba nia Oan Mane: “O nia kadunan, ou Maromak, hamriik ba nafatin; oe justisa nian sei sai o nia reinu nia oe. ⁹ O hadomi justisa no hirus laran aat; ne’e duni, Maromak, o nia Maromak, kose o ho mina ksolok nian iha o nia maluk sira leten”, ¹⁰ no:  “Wainhira mundu hahu, ou Na’i, Ita Boot hakiak rai ne’e, no lalehan mak Ita Boot liman nia hahalok. ¹¹ Sira hotu sei mohu lakon, maibe Ita Boot sei hela nafatin; sira sei sai tuan hanesan hatais ida; ¹² Ita sei lulun sira hanesan unuk ida, no hanesan hatais ida mak ema troka sira. Maibe Ita Boot hanesan nafatin, Ita nia otas rohan laek.

¹³ Maibe ba anju ida nebe mak Nia dehan: “Tur tiha iha ha’u nia sorin kuana to’o ha’u halo o nia funubalun sira sai fatin ida ba o nia ain”?

¹⁴ Anju sira ne’e la’os espiritu nebe Maromak haruka atu serbi, ba sira nebe atu simu maksoin nudar sira nia liman rohan?