3

Jesus boot liu fali Moises

                ¹ Ne’e duni, maun alin santu sira nebe halo parte iha vokasaun lalehan nian, hanoin Jesus ba; Nia mak ita nia fiar nia apostolu no am’lulik boot. ² Nia laran metin ba Ida nebe foti Nia, nudar Moises laran metin iha Maromak nia uma. ³ Maibe Jesus soi gloria nebe boot liu fali Moises ninian, nudar ema nebe harii uma ida simu gloria nebe boot liu fali uma rasik. ⁴ Ema harii uma ida-ida, maibe Maromak harii buat hot-hotu. ⁵ Moises laran metin iha buat hot-hotu iha Maromak nia uma nudar atan ida, atu fo sasin ba buat nebe sei haklaken ikus, ⁶ maibe Kristu laran metin nudar oan rasik nebe foti tiha atu tau matan ba Nia uma. No ita mak Nia uma wainhira ita metin ba buat nebe ita fiar no hahi an iha buat nebe ita hein.

La bele halo sala

                Espiritu Santu dehan: “Ohin  imi rona karik Nia lia, keta halo tos imi nia fuan hanesan iha loron nebe imi foti liman hasouru Nia, iha loron babeur nian iha rai fuik maran, ⁹ iha nebe imi nia bei-ala sira koko Ha’u no hare Ha’u nia hahalok sira iha tinan haat nulu nia laran. Tan ne’e Ha’u laran nakali ho otas ne’e hodi dehan, ‘Sira nia fuan la’o la los nafatin; sira la hatene ha’u nia dalan sira.’ ¹¹ Ho laran nakali, Ha’u jura, ‘Sira ne’e sei la tama iha Ha’u nia hakmatek.’” ¹² Matan moris ba, maun alin sira, atu imi la bele sai fiar laek, hodi lori imi atu hadook an housi Maromak moris. ¹³ Loron loron fo aten berani ba malu wainhira sei “ohin”, atu imi ida mos la bele sai laran tos tan sala lohi imi. ¹⁴ Ita kaer metin to’o rohan karik buat nebe ita fiar ona, ita sai Kristu nia maluk, ¹⁵ basa ema dehan: “Ohin imi rona karik  Nia lia, keta halo tos imi nia fuan hanesan iha loron nebe imi foti liman hasouru Nia.” ¹⁶ Sira se los mak rona maibe foti liman hasouru Na’i? La’os sira hotu nebe sai housi Egiptu iha Moises nia ukun? ¹⁷ Ho se mak Na’i laran nakali iha tinan haat nulu nia laran? La’os sira nebe halo sala, no sira nia isin mate monu iha rai fuik maran? ¹⁸ Ba ema semak Na’i jura katak sira sei la tama iha Nia hakmatek? La’os sira nebe lakohi halo tuir? ¹⁹ Ne’e duni, ita hare katak sira la bele tama basa sira fiar laek.