5

Kristu am’lulik tuir Melquisedec nian

                ¹ Am’lulik boot ida-ida mai housi ema sira leet no ema foti nia atu hamriik iha ema sira nia fatin iha Maromak futar oin, atu hasa’e buat karan no sakrifisiu ba sala sira. ² Nia bele trata di-diak sira nebe beik no halo sala basa nia rasik mos koko atu sai kbiit laek. ³ Ne’e duni, nia mos ten ke hasa’e buat karan ba sala ba nia an rasik no mos ba povu. ⁴ Ema ida la foti knaar kmanek ne’e ba nia an, maibe wainhira Maromak bolu nia nudar Maromak bolu Aaron. ⁵ Nune’e mos, Kristu la fo naran boot ba Nia An rasik wainhira Nia sai Am’lulik Boot, maibe Ida nebe dehan ba Nia: “O Ha’u nia Oan Mane; ohin Ha’u hahoris O.” ⁶ Nune’e mos Nia dehan iha fatin seluk: “O am’lulik ba nafatin tuir Melquisedec nian.” ⁷ Wainhira Nia sei moris iha rai ne’e, Nia hasa’e orasaun no harohan ho lia maka’as no mataben ba Ida nebe bele soi Nia housi mate, no Maromak rona Nia tan Nia haraik an ba Na’i. ⁸ Maski Nia Oan Mane, Nia aprende atu halo tuir housi buat nebe Nia terus; ⁹ no wainhira Nia sai los ona, Nia sai be matan maksoin rohan laek nian ba sira hotu nebe halo tuir Nia hakarak. ¹⁰ Maromak foti Nia nudar Am’lulik Boot tuir Melquisedec.

Paulo husu ema Ebreu sira atu sai ema boot iha fiar

                ¹¹ Kona ba ida ne’e, ha’u iha buat barak  atu hateten nebe susar mai ha’u atu koalia mo-mos, basa imi nei-neik liu atu komprende. ¹² Lo-los ohin imi ten ke sai ona mestre, maibe imi sei presisa ema seluk atu hanorin imi dala ida tan kona ba buat hirak nebe uluk liu kona ba Maromak nia liafuan. Imi sei presisa susuben, la’os etu tasak. ¹³ Tebes, ema nebe hemu deit susuben seidauk prontu ba liafuan justisa nian, basa nia sei labarik ida. ¹⁴ Maibe fo etu tasak ba ema boot, ba sira nebe komprende ona atu hatene buat nebe diak housi buat nebe aat.