5
1
Am’lulik boot ida-ida mai housi ema sira leet no ema foti nia atu hamriik
iha ema sira nia fatin iha Maromak futar oin, atu hasa’e buat karan no
sakrifisiu ba sala sira. 2 Nia bele trata di-diak
sira nebe beik no halo sala basa nia rasik mos koko atu sai kbiit laek.
3 Ne’e duni, nia mos ten ke hasa’e buat karan ba sala ba nia an rasik no
mos ba povu. 4 Ema ida la foti knaar kmanek ne’e ba
nia an, maibe wainhira Maromak bolu nia nudar Maromak bolu Aaron. 5
Nune’e mos, Kristu la fo naran boot ba Nia An rasik wainhira Nia sai
Am’lulik Boot, maibe Ida nebe dehan ba Nia: “O Ha’u nia Oan Mane; ohin Ha’u
hahoris O.” 6 Nune’e mos Nia dehan iha fatin seluk:
“O am’lulik ba nafatin tuir Melquisedec nian.” 7 Wainhira
Nia sei moris iha rai ne’e, Nia hasa’e orasaun no harohan ho lia maka’as no
mataben ba Ida nebe bele soi Nia housi mate, no Maromak rona Nia tan Nia haraik
an ba Na’i. 8 Maski Nia Oan Mane, Nia aprende atu
halo tuir housi buat nebe Nia terus; 9 no wainhira
Nia sai los ona, Nia sai be matan maksoin rohan laek nian ba sira hotu nebe
halo tuir Nia hakarak. 10 Maromak foti Nia nudar
Am’lulik Boot tuir Melquisedec.
Paulo
husu ema Ebreu sira atu sai ema boot iha fiar
11
Kona ba ida ne’e, ha’u iha buat barak
atu hateten nebe susar mai ha’u atu koalia mo-mos, basa imi nei-neik liu
atu komprende. 12 Lo-los ohin imi ten ke sai ona
mestre, maibe imi sei presisa ema seluk atu hanorin imi dala ida tan kona ba
buat hirak nebe uluk liu kona ba Maromak nia liafuan. Imi sei presisa susuben,
la’os etu tasak. 13 Tebes, ema nebe hemu deit
susuben seidauk prontu ba liafuan justisa nian, basa nia sei labarik ida. 14
Maibe fo etu tasak ba ema boot, ba sira nebe komprende ona atu hatene
buat nebe diak housi buat nebe aat.
|