7

Melquisedec

                ¹ Melquisedec, liurai Salem nian, Maromak aas liu nia am’lulik ida, ba hasouru Abraao wainhira nia fila mai housi funu hasouru liurai sira, no nia fo bensaun ba Abraao, no Abraao fo ba nia parte sanulu housi buat hotu nebe nia iha. ² Nia naran katak liurai justisa nian no mos liurai Salem, katak, liurai dame nian. Nia la iha aman, inan ka bei-ala sira no nia moris mos la hahu no rohan laek; nia hanesan Maromak nia Oan. Nia am’lulik ba nafatin.

Melquisedec simu impostu housi Abraao

                ⁴ Hanoin ba oin sa  nia boot duni, basa am’tuak Abraao selu ba nia impostu parte sanulu nian housi rikusoi nebe nia kaer iha funu. ⁵ Ukunfuan haruka Levi nia bei-oan sira nebe simu knaar am’lulik nian atu simu impostu parte sanulu nian housi povu, katak, housi sira nia maun alin maski sira mos Abraao nia bei-oan. ⁶ Maibe ema ne’e, nebe nia bei-ala sira la mai housi Abraao, simu impostu parte sanulu nian housi Abraao, no nia mak fo bensaun ba ida nebe simu Maromak nia promessa. ⁷ Ita hatene lo-los katak ida nebe kiik liu simu bensaun housi ida nebe boot liu. ⁸  Iha kasu ida ne’e, ema bai-bain mak simu impostu; iha kasu seluk, ema ida nebe simu mak ema nebe moris ba nafatin. ⁹ Ita bele dehan katak Levi rasik nebe simu impostu, selu impostu iha Abraao nia laran, ¹⁰ basa nia sei iha nia bei-ala nia isin wainhira Melquisedec mai hasouru nia.

Knaar am’lulik Levi no Melquisedec nian

                ¹¹ Knaar am’lulik Levi nian los ona karik tamba nia hametin ukunfuan nebe saran  tiha ba nasaun, tan sa sei presisa atu hahu knaar am’lulik seluk tan; knaar nebe tuir Melquisedec nian, la’os tuir Aarao nian? ¹² Basa wainhira muda knaar am’lulik nian, ne’e katak muda mos ukunfuan. ¹³ Basa ita koalia kona ba ema nebe mai housi suku seluk, suku nebe nia emar sira nunka halo knaar am’lulik nian. ¹⁴ Ita hotu hatene katak Na’i mai housi suku Juda nian. Moises la koalia kona ba suku Juda nian wainhira nia koalia kona ba am’lulik sira.

Halakon tiha ukunfuan tuan nia kbiit

                ¹⁵ Ita bele hare ne’e mo-mos liu wainhira am’lulik ida tan mosu tuir Melquisedec nia ilas, ¹⁶ nebe sai am’lulik la’os tuir ukunfuan kona ba derasaun isin nian, maibe tan kbiit housi moris nebe la bele estraga. ¹⁷ Basa kona ba nia mak lia sasin ida ne’e mosu: “O am’lulik ba nafatin tuir knaar Melquisedec nian.” ¹⁸ Nune’e, housi sorin ida, ukunfuan tuan lakon ona nia kbiit  tan nia forsa no folin la iha ona, ¹⁹ basa ukunfuan la halo ema sai los; iha sorin seluk, esperansa nebe diak liu mosu mai, no housi esperansa nee mak ita bele hakbesik ba Maromak.

Kristu nia knaar am’lulik la muda

                ²⁰ Buat ne’e mosu ho juramentu ida. Los duni, sira seluk sai am’lulik hodi la halo juramentu; ²¹ maibe ida ne’e, ho juramentu: “Na’i halo juramentu ida no Nia sei la muda nia hanoin; ‘O am’lulik ba nafatin.’”  ²² Ne’e duni, Jesus sai prenda aliansa nebe diak liu. ²³ Am’lulik sira seluk barak duni, basa sira ida-ida mate no la bele kaer knaar am’lulik nian ba nafatin; ²⁴ maibe Nia kaer knaar am’lulik nian ba nafatin, basa Nia moris ba nafatin.  ²⁵ Ne’e duni, Nia bele soi ema nebe hakbesik Maromak housi Nia ba nafatin, basa Nia moris nafatin atu harohan ba sira.

Kristu mak am’lulik boot lalehan nian

                ²⁶ Los duni katak ita iha am’lulik boot hanesan ne’e: santu, sala laek no foer laek, haketak an housi ema maksalak sira, no foti tiha aas liu lalehan. ²⁷ Nia la presisa hasa’e sakrifisiu loron loron nudar am’lulik boot sira seluk halo tan sira rasik nia sala no mos tan povu nia sala; Nia halo hotu ne’e dala ida deit wainhira nia hasa’e nia an rasik. ²⁸ Los duni, ukunfuan foti nudar am’lulik boot sira ema sira nebe kbiit laek; maibe juramentu nebe mai wainhira ukunfuan iha ona, foti Oan Mane nebe sai ema los ba nafatin.