8

Knaar am’lulik foun no sakrifisiu foun

                ¹ Buat nebe folin liu kona ba buat hotu nebe ita foin dehan sa’e ne’e mak: ita iha am’lulik boot ida nebe tur iha Maromak nia kadunan nia kuana iha lalehan, ² Nia mak ministru iha santuariu no iha Tenda Halibur Malu lo-los nian nebe Na’i rasik, la’os ema deit, mak harii. ³ Basa am’lulik boot ida-ida iha knaar atu hasa’e presente no sakrifisiu; ne’e duni, am’lulik ida ne’e mos ten ke hasa’e buat ruma. ⁴ Nia iha rai ne’e karik, Nia la bele sai am’lulik, basa iha ona am’lulik seluk atu hasa’e buat karan sira tuir ukunfuan. ⁵ Maibe sira ne’e halo deit buat nebe hanesan lalatak ka ilas housi buat nebe mosu iha lalehan, basa wainhira Maromak haruka Moises atu halo tenda ida, Maromak haruka nia dehan: “Hare ba katak o halo tuir lo-los buat nebe hatudu ba o iha foho leten.”

Kristu no aliansa boot liu

                ⁶ Maibe Kristu simu knaar am’lulik nian nebe boot liu ida tuan nian, basa aliansa nebe Nia lori mai mak aliansa nebe diak liu, basa halo promessa nebe diak liu. ⁷ Aliansa uluk nian la kuran buat ida karik, la presisa katak aliansa foun seluk tan taka nia fatin. ⁸ Maibe, tebes duni, Maromak hare katak nia kuran duni, wainhira Nia dehan: “‘Loron sira sei mai,’ Na’i mak dehan, ‘wainhira Ha’u sei halo aliansa foun ho uma-kain Israel nian no uma-kain Juda nian; ⁹ la’os hanesan aliansa nebe Ha’u halo ona ho sira nia bei-ala sira iha loron nebe Ha’u kaer sira nia liman atu hasai sira housi rai Egiptu, basa sira husik tiha Ha’u nia aliansa ne’e, tan ne’e Ha’u mos husik tiha sira.’ Na’i koalia nune’e:  ¹⁰ ‘Ne’e mak aliansa nebe Ha’u sei halo ho uma-kain Israel nian wainhira loron sira ne’e sei to’o mai,’ Na’i koalia, ‘Ha’u sei tau ha’u nia ukunfuan iha sira nia hanoin no hakerek sira iha sira nia fuan. Nune’e, Ha’u sei sai sira nia Maromak no sira sei sai Ha’u nia povu. ¹¹ Sei la presisa tan katak vesinu sei buka hanorin nia maluk, ka maun atu dehan ba nia alin, ‘Hatene Na’i ba,’ basa sira hotu sei hatene Ha’u, Housi ida nebe kiik liu to’o ida nebe boot liu. ¹² Basa Ha’u sei perdua sira nia hahalok aat no haluha ona sira nia sala hotu.’”

                ¹³ Hodi koalia kona ba aliansa foun, Nia dehan katak ida uluk folin la iha ona. Buat nebe folin la iha ona no sai tuan ona prontu ona atu mohu.