5

Rahun diak sira.

                ¹ Hare tiha ema lubun boot, Jesus sa'e ba foho ida. Wainhira Nia tur tiha, eskolante sira hakbesik ba Nia, ² Nia hahu hanorin sira hodi dehan nune'e: ^3“ Ksolok ba ema sira nebe kiak iha laran, basa reinu lalehan sira nian. ⁴ Ksolok ba sira nebe haraik an, basa sira sei simu rai nudar liman rohan. ⁵ Ksolok ba sira nebe tanis, basa sira sei hetan kmaan. ⁶ Ksolok ba sira nebe hamlaha no hamrook ba justisa, basa sira sei bosu. ⁷ Ksolok ba sira nebe laran luak, basa sira sei hetan laran luak. ⁸ Ksolok ba sira nebe laran mos, basa sira sei hare Maromak. ⁹ Ksolok ba sira nebe buka dame, basa ema sei bolu sira Maromak oan. ¹⁰ Ksolok ba sira nebe ema duni, fo terus, tan buka justisa, basa reinu lalehan sira nian. ¹¹ Ksolok ba imi wainhira, tamba Ha'u, ema hateten aat imi, duni imi hodi bobar lia bosok hasouru imi. ¹² Imi  haksolok ba, foti neon ba, basa imi nia kolen iha lalehan wa’in liu; basa nune'e mos sira duni profeta sira nebe mai uluk liu imi.”

Eskolante sira nia knaar.

^13“ Imi masin rai nian, maibe masin lakon karik nia mer, nia sei hamer an oin sa? Nia la soi  ona ba buat ida, soi deit atu soe ba liur, ema atu sama. ¹⁴ Imi mundu nia roman. Sidade nebe harii iha foho leten, la bele subar an. ¹⁵ Ema la sunu ahi-oan hodi tau iha fatin okos, maibe tau iha fatin aas atu leno ema hotu iha uma laran. ¹⁶ Imi nia roman sei nabilan mos hanesan ne'e iha ema sira oin, atu sira hare imi nia hahalok diak sira hodi hahi imi nia Aman iha lalehan.”

Ukunfuan tuan no foun

^17“ Imi keta hanoin Ha'u mai atu hasai tiha ukunfuan no profeta sira; Ha'u mai la'os atu hasai, maibe atu halo tuir lo-los. ¹⁸ Ha'u dehan lialos ba imi: maski lalehan no rai lakon, ukunfuan nia baluk ida mos sei la lakon, sei kumpri hotu. ¹⁹ Ne'e duni, ema nebe la halo tuir ukunfuan kiik liu sira ne'e ida hodi hanorin nune'e ba ema, nia sei sai kiik liu iha reinu lalehan. Maibe ema nebe halo tuir hodi hanorin mos ba ema seluk, ema ne'e sei sai boot iha reinu lalehan. ²⁰ Basa ha'u dehan ba imi katak imi nia justisa la los liu karik eskriba no fariseu sira nian, imi sei la tama iha reinu lalehan.”

                ²¹ “Imi rona katak uluk ema dehan ba ita nia bei-ala sira: ‘O keta oho; ema nebe oho, sei simu kastigu.’  ²² Ha'u fali dehan ba imi; ‘Ema nebe laran nakali hasouru nia maun alin sira sei hatan iha tribunal; ema nebe bolu nia ‘bulak’ sei terus iha ahi infernu nian.’ ²³ Ne'e duni, wainhira o atu hasa'e dau-daun o nia buat karan iha altar, o hanoin fali katak o nia maun alin ida hirus o, ²⁴ husik o nia buat karan iha altar hodi ba uluk dame malu ho nia, hafoin mai hasa'e o nia buat karan. ²⁵ Buka dame malu lalais ho nia funu balun wainhira imi la'o hamutuk ba tribunal; keta halo nebe nia fo o ba juis fo fali o ba guarda, guarda hatama o ba kadeia. ²⁶ Ha'u dehan lo-los ba o, o sei la sai housi neba to'o o selu hotu.”

²⁷ “Imi rona ema dehan; ‘O keta sala ho ema nia kaben.’ ²⁸ Maibe Ha'u dehan ba imi; ‘Ema nebe hateke ba feto ida hodi kaan nia, nia halo ona sala foer ho nia iha nia laran.’ ²⁹ Ne'e duni o nia matan los dada o karik ba sala, losu sai tiha nia, soe ba dook; lakon o nia matan ida, diak liu fali monu ba infernu ho o nia isin lolon tomak.”

^30“ O nia liman los mak dada karik o ba sala, tesi tiha nia, soe ba dook; lakon o nia liman ida, diak liu fali monu ba infernu ho isin lolon tomak. ³¹ Ema uluk dehan tan: ‘Ema nebe soe nia feen, sei fo surat soe malu nian ba nia.’ ³² Maibe Ha'u dehan ba imi: ‘Ema nebe soe nia feen tan adulteriu, nia bele halo nia feen monu ba adulteriu.’”

^33“ Nune'e mos imi rona uluk ema dehan ba bei-ala sira: ‘Halo tuir o nia juramentu, kumpri buat nebe o jura ba Na’i.’ ³⁴ Maibe Ha'u dehan ba imi: ‘Imi la bele jura kona ba buat naran ida. Keta jura hodi lalehan basa ne’e Maromak nia kadunan; ³⁵ Keta jura hodi rai, basa ne’e Na’i nia sama fatin; keta jura mos hodi Jerusalem, basa nia Liurai boot nia sidade. ³⁶ Keta jura hodi o nia ulun, basa o la bele halo o nia fuuk lahan ida sai mutin ka metan. ³⁷ Maibe imi sei koalia hanesan ne'e: Nune'e, nune'e; la nune'e, la nune'e. Liu fali ne'e, mai housi ida nebe aat.’”

^38“ Imi rona ema uluk dehan: ‘Matan selu ho matan, nehan selu ho nehan.’ ³⁹ Maibe Ha'u dehan ba imi: ‘Keta simu hasouru ema aat. Ema ruma basa karik o nia oin los, se'e tan o nia oin karuk ba nia. ⁴⁰ Ema ruma hakarak haksesuk malu ho o atu hadau o nia faru karik, fo tan o nia tais ba nia. ⁴¹ Ema ruma obriga karik o atu la'o kilometru ida, la'o ho nia kilometru rua ba. ⁴² Fo ba ema nebe husu, keta fila kotuk ba sira nebe husu impresta.”

Domin ba funu balun  sira

^43“ Imi rona ema uluk dehan: ‘Hadomi o nia maluk, rai odi hasouru o nia funu balun.’ ⁴⁴ Ha'u fali dehan ba imi: ‘Hadomi imi nia funu balun sira, harohan ba sira nebe duni imi, ⁴⁵ atu imi sai imi Aman iha lalehan nia oan sira. Basa Nia halo loron mosu ba ema diak no ba ema aat, halo mos udan ben monu ba ema laran mos no ba ema sala na'in hanesan. ⁴⁶ Basa imi hadomi karik ema nebe hadomi imi, imi sei simu kolen nebe? ⁴⁷ Imi kumprimenta deit imi nia maun alin sira, imi halo buat foun sa ida? Ema gentiu sira mos la halo hanesan ne'e? ⁴⁸ Imi buka sai diak lo-los, hanesan imi nia Aman iha lalehan diak lo-los.’”