11

Bei-ala sira nia fiar nebe diak los

                ¹ Fiar mak laran metin kona ba rahun diak sira nebe ita hein, hatene lo-los katak buat sira nebe ita matan la hare ohin iha duni. ² Tan fiar mak Maromak haksolok ho ita nia bei-ala sira. ³ Tan fiar mak ita komprende katak Maromak hakiak mundu ho Nia liafuan deit, nune’e buat nebe iha mai housi buat sira nebe ita la hare.

                ⁴ Hodi fiar mak Abel hasa’e ba Maromak buat karan nebe diak liu fali Caim ninian, no tan ne’e mak Maromak hanaran nia ema los wainhira Maromak simu nia buat karan. Maski nia mate ona, nia sei koalia dau-daun hodi fiar.

                ⁵ Hodi fiar mak Maromak foti Enoc atu nia la koko mate: ema la hetan ona nia, basa Maromak foti tiha nia. Ne’e tamba molok Maromak foti nia, ema dehan tiha ona katak nia monu los ba Maromak nia laran. ⁶ Maibe fiar la iha karik, ema ida la bele monu los ba Maromak nia laran, basa ema hot-hotu nebe hakbesik ba Nia ten ke fiar katak Nia iha duni no katak Nia fo kolen ba sira nebe buka Nia.

                ⁷ Hodi fiar mak Noe, wainhira Maromak fo sai ba nia kona ba buat sira nebe ema seidauk hare, rona ho tauk santu no halo ro boot atu soi nia familia. Ho ne’e Noe hatudu katak mundu sala duni, no nia sai liman rohan na’in justisa nian nebe mai hodi fiar.

                ⁸ Hodi fiar mak Abraao halo tuir Maromak nia bolu atu la’o ba rai nebe Maromak sei fo nudar liman rohan ba nia no ba nia bei-oan sira; hodi fiar ne’e mak nia la’o ba maski la hatene nia atu ba nebe. ⁹ Hodi fiar mak nia to’o nudar ema la’o rai ida ba Rai nebe Maromak hakotu, hodi hela iha neba hanesan iha ema seluk nia rai nian, hamutuk ho Isaac no Jacob, nebe hamutuk ho nia, mesak promessa nia liman rohan na’in hotu. ¹⁰ Sira hela iha neba iha tenda laran, hodi hein dau-daun sidade nebe Maromak harii, hanoin no hakiak.

                ¹¹ Hodi fiar mos mak Sara, maski nia otas liu ona, bele ko’us labarik, basa nia fiar katak ida nebe halo promessa sei halo tuir duni. ¹² Tan ne’e, sai hodi ema ida nebe hanesan mate ona bei-oan sira moris mai barak liu sura la bele, hanesan fitun sira iha lalehan eh rai henek iha tasi ibun.

                ¹³ Sira hotu ne’e mate iha fiar laran, molok sira simu buat nebe hakotu ona ba sira, maibe sira hare buat ne’e housi dook hodi simu sira, hodi simu an nudar ema rai seluk nian no ema la’o rai iha mundu ne’e. ¹⁴ Basa ema sira nebe koalia kona ba sira ho liafuan hirak ne’e hatudu lo-los katak sira hein ho laran sira nia rai lo-los. ¹⁵ Sira la koalia kona ba rai housi nebe sira sai, basa sira bele fila fali ba nia; ¹⁶ maibe sira kaan rai nebe diak liu, katak sira nia uma iha lalehan. Tan ne’e mak Maromak la moe wainhira ema dehan katak Nia mak sira nia Maromak, basa Nia mak hadia sidade ida ba sira.

                ¹⁷ Hodi fiar mak Abraao, wainhira Maromak koko nia, hasa’e Isaac. Maski Maromak halo promessa ba nia, Nia hakarak hasa’e nia oan mane mesak. ¹⁸ Kona ba oan ne’e Maromak dehan ba nia, “Housi Isaac mak o nia bei-oan sira sei simu naran.” ¹⁹ Nia laran metin katak Maromak iha kbiit atu halo ema mate moris hi’as fali; ne’e duni, hodi koalia ho aiknanoik ida, nia simu fali Isaac housi ema mate sira leet.

                ²⁰ Hodi fiar mak Isaac fo bensa ba Jacob no Esau ba tempu nebe sei mai. ²¹ Hodi fiar mak Jacob, wainhira nia besik atu mate, fo bensa ba Jose nia oan sira, hodi sader ba nia ai-tonka, hodi hakru’uk atu resa. ²² Hodi fiar mak Jose, wainhira nia atu mate ona, hare ema Israel sira sai housi Egiptu no nia fo sai oin sa sira sei hakoi nia.

                ²³ Hodi fiar mak Moises nia aman inan, wainhira nia moris, subar nia ba fulan tolu; basa sira hare katak labarik ne’e bonitu, no sira la tauk liurai nia ukunfuan. ²⁴ Hodi fiar mak Moises, wainhira nia ema boot ona, lakohi katak ema hare nia nudar liurai boot nia oan feto nia oan, ²⁵ maibe nia hakarak katak ema trata aat nia hamutuk ho Maromak nia povu liu fali haksolok ba tempu uitoan iha sala laran. ²⁶ Nia hanoin katak lia hasara nebe ema dehan ba ida nebe Maromak kose ho mina folin liu fali rikusoi tomak Egiptu ninian, basa nia matan hateke ba kolen lo-los. ²⁷ Hodi fiar mak nia husik rai Egiptu no la tauk liurai nia laran nakali; basa nia laran metin to’o rohan hanesan ema nebe hare ida nebe matan la hare. ²⁸ Hodi fiar mak nia halo Paskua hodi hisik ran atu ida nebe atu oho oan mane boot sira la bele book Israel nia oan sira. ²⁹ Hodi fiar mak sira hakur Tasi Mean hanesan iha rai maran deit, maibe wainhira ema Egiptu sira halo tuir, sira mout mate.

                ³⁰ Hodi fiar mak Jerico nia muru sira monu wainhira povu la’o hale’u sira ba loron hitu. ³¹ Hodi fiar mak feto aat Rahab la mate hamutuk ho gentiu sira, basa nia simu Israel oan sira.

                ³¹ Ha’u sei dehan sa ida tan? Basa la iha tempu mai ha’u atu haktuir kona ba Gideao, Barac, Sansao, Gefta, ka David, Samuel no profeta sira. ³³ Sira ne’e, tan sira nia fiar, manan reinu sira, hametin justisa, simu promessa, taka leaun nia ibun, ³⁴ hamate ahi nebe lakan maka’as, halai housi surik nia kroat. Sira ema kbiit laek nebe simu kbiit housi Maromak, sira sai berani iha funu laran, duni sai funubalun sira nebe mai housi rai seluk. ³⁵ Feto sira simu fali sira nia matebian housi moris hi'as; balun hetan kastigu maibe lakohi katak ema husik sira atu sira bele moris hi’as fali ba moris nebe diak liu. ³⁶ Balun hetan terus hodi ema hasara sira, baku sira, ka kesi metin ho korente no tama iha dadur laran. ³⁷ Ema tuda sira, ka kadu sira sai sorin rua, ka oho sira ho surik; sira hatais ho bibi malae eh bibi timor nia kulit; sira osan la iha, terus barak no ema trata sira aat liu. ³⁸ Mundu la soi atu sira hela iha nia; sira la’o ba la’o mai iha rai fuik maran no iha foho leten, iha rai kuak no rai klean sira. ³⁹ Sira ne’e, maski ema boot iha fiar, sira la simu buat nebe hakotu tiha ona, ⁴⁰ basa Maromak halo atu ita bele simu buat nebe diak liu, no sira sei la hetan kmanek lo-los wainhira la’os hamutuk ho ita.