SURAT BA SARANI SIRA TIAGO

1

Introdusaun

                ¹ Housi Tiago, Maromak no Na’i Jesus Kristu nia atan, ba suku sanulu resin rua namkari iha raiklaran: Kumprimentu!

Fiar no matenek

                ² Maun alin sira: haksolok ba wainhira imi hetan susar oi-oin, ³ basa imi hatene katak wainhira imi nia fiar manan babeur, imi laran metin liu tan. ⁴ Hare ba katak imi laran metin to’o rohan, atu imi sai lo-los, hodi la kuran buat ida. ⁵ Imi ida kuran matenek karik, nia sei husu Maromak ba. Nia sei fo ba ema hot-hotu ho laran luak hodi la si’ak, no ema ne’e sei hetan matenek. ⁶ Maibe nia sei husu hodi fiar, laran la namlele, basa ema nebe laran namlele hanesan laloran tasi nian nebe anin hu’u no lori mai lori ba. ^{7-[ETML -S:versetto]8}Ema hanesan ne’e, nebe laran la metin no namlele iha buat nebe nia halo, keta hanoin katak nia sei simu buat ruma housi Maromak.

Ema kiak

                ⁹ Ema kiak sei haksolok ba wainhira Maromak foti nia; ¹⁰ no ema riku sei haksolok ba wainhira Na’i hatun nia; basa nia, hanesan du’ut fuik nia ai-funan ida sei liu. ¹¹ Loron sa’e no sai manas maka’as hodi halo du’ut maran; nia ai-funan monu, no nia furak lakon ona. Nune’e mos mak ema riku nebe buka moris dau-daun, sei lakon.

Babeur

                ¹² Rahun diak ba ema nebe tahan babeur, basa wainhira nia manan tiha, nia sei simu kolen moris nian nebe Maromak hakotu ona ba sira nebe hadomi nia. ¹³ Ema ida la bele hateten wainhira nia hetan tentasaun, “Maromak koko ha’u”; basa ema ida la bele babeur Maromak no Nia mos la koko ema; ¹⁴ ema hetan tentasaun wainhira nia hakarak aat rasik mak koko nia. ¹⁵ Hakarak aat ne’e fo fuan, no lori ba sala; wainhira sala sai boot ona, sala lori mate mai.

                ¹⁶ Keta bosok an, maun alin doben sira! ¹⁷ Presente diak ida-ida no kmanek lo-los ida-ida mai housi lalehan, housi Maromak nebe hakiak naroman lalehan nian. Nia la muda ka halo nakukun mosu mai. ¹⁸ Hodi Nia rasik nia hakarak, Nia hakiak ita housi liafuan lialos nian atu ita bele sai kriatura hot-hotu nia ulun.

Rona no halo tuir

                ¹⁹ Hatene ba buat ida ne’e, maun alin doben sira: ema ida-ida lalais atu se tilun ba; nei-neik atu koalia, nei-neik atu hirus; ²⁰ basa ema nia hirus la hetan Maromak nia justisa. ²¹ Ne’e duni, hadook an housi hahalok foer no moris aat, hodi simu ho haraik an liafuan nebe Nia tau iha imi nia fuan basa liafuan ne’e bele soi imi.

                ²² Maibe haka’as an atu sai ema nebe halo tuir liafuan ba, la’os deit rona nia, hodi bosok imi an. ²³ Basa ema rona deit liafuan karik, maibe la halo tuir nia, ema ne’e hanesan ema nebe hateke ba nia oin iha espeliu no hare duni nia oin rasik. ²⁴ Nia hare tiha di-diak nia oin, hafoin haluha kedas nia ilas oin sa los. ²⁵ Maibe ema nebe hateke di-diak ba ukunfuan lo-los nebe soi ema, ema nebe tau duni nia laran ba nia, la’os rona deit nia hafoin haluha kedas, ema nebe halo tuir duni nia, ema ne’e sei hetan Maromak nia bensa iha buat hotu nebe nia halo.

                ²⁶ Ema ruma hanoin katak nia besik Maromak, maibe la hatene ukun nia nanal karik hodi bosok nia fuan, ema ne’e nia religiaun folin laek. ²⁷ Religiaun mo-mos no lo-los iha Maromak no Aman nia oin mak ne’e: Tau matan ba oan kiak no feto faluk sira iha sira nia susar, no hadook an housi mundu ne’e nia hahalok aat.