4

Habelun malu ho mundu

                ¹ Tan sa iha funu, tan sa imi istori malu? La’os tamba imi nia hakarak aat halo funu iha imi laran? ² Imi hakarak buat ida, maibe imi la iha buat ne’e; nune’e imi oho. Imi kaan buat ida, maibe imi la hetan nia, tan ne’e imi halo funu. Imi la iha, basa imi la husu. ³ Imi husu, maibe imi la simu, basa imi husu la los: atu usa nia ba imi nia hakarak aat. ⁴ Ema laran aat! Imi la hatene katak wainhira imi habelun ho mundu, imi halo funu hasouru Maromak? Ne’e duni, ema nebe hakarak habelun mundu halo nia an Maromak nia funu balun. ⁵ Imi hanoin katak Eskritura hateten leet deit wainhira nia dehan, “Maromak laran moras liu kona ba Espiritu nebe Nia tau iha ita nia laran.” ⁶ Maibe Nia fo grasa barak liu, tan ne’e mak nia dehan, “Maromak la gosta ema loko an, maibe fo grasa ba ema nebe haraik an.” ⁷ Ne’e duni, hakru’uk ba Maromak ba. Halo funu hasouru diabu no nia sei halai housi imi. ⁸ Hakbesik ba Maromak, no nia sei hakbesik imi. Hamos imi nia liman, imi ema maksalak sira; hamos imi nia fuan, imi ema laran makerek sira. ⁹ Hakribi imi nia sala hodi tanis ba. Halo imi nia hamnasa nakfila ba mataben, no imi nia laran haksolok ba laran nakraik. ¹⁰ Haraik an ba iha Maromak futar oin; Nia sei foti imi.

Keta tesi lia kona ba imi nia maluk ida

                ¹¹ Maun alin sira, keta koalia aat kona ba maluk sira. Se mak koalia aat kona ba nia maluk ida ka tesi lia kona ba nia maluk ida, koalia aat hasouru ukunfuan hodi tesi lia kona ba ukunfuan. Maibe imi tesi lia kona ba ukunfuan karik, imi la halo tuir ukunfuan, maibe imi lia na’in ukunfuan nian. ¹² Iha ukunfuan na’in no lia na’in ida deit. Nia bele soi ema eh halo aat nia. Imi fali, imi se atu tesi lia kona ba imi nia maluk ida?

Keta gaba an

                ¹³ Imi nebe dehan,  “Ohin ka aban ita sei ba fatin ida neba, hela iha neba tinan ida hodi fila liman no manan osan;” maibe imi la hatene kona ba aban. Imi nia moris sa ida? ¹⁴ Imi hanesan abu-abu nebe mosu ba tempu uitoan, hafoin lakon fali. ¹⁵ Lo-los, imi sei dehan, “Maromak hakarak karik, ita sei moris hodi halo ida ne’e ka ida neba.” ¹⁶ Maibe, imi gaba an hodi foti an. Loko an ne’e aat liu. ¹⁷ Ema nebe hatene buat nebe los maibe la halo nia, halo sala.