5

Susar ba ema riku

                ¹ Ema riku sira, oras ne’e se tilun mai! Imi tanis hodi hakilar maka’as kona ba susar barak nebe atu mosu iha imi leten. ² Imi nia rikusoi dodok hotu ona; ular han tiha imi nia hatais; ³ imi nia murak mean no mutin meak hotu ona; imi nia murak mean sira sei sasin hasouru imi no hanesan ahi, sei han mohu imi nia isin. Iha loron ikus hirak ne’e imi halibur tiha rikusoi ba imi an rasik. ⁴ Imi rai hela serbisu na’in sira nia kolen. Sira tanis hodi sisi justisa, no sira nia lia sa’e ona to’o Maromak, kbiit Na’in. ⁵ Imi moris iha rai hodi haksolok ho imi nia sala oi-oin. Hanesan ema habokur balada ba loron atu oho nia, imi habokur imi an. ⁶ Imi tesi lia hodi oho ema diak nebe la buka atu hasouru imi.

Pasiensia ho orasaun

                ⁷ Ne’e duni, maun alin sira, pasiensia ba to’o loron Na’i hiit an mai. To’os na’in hein rai ne’e nia fuan folin liu, hodi hein ho pasiensia to’o udan uluk no udan ikus habokon nia. ⁸ Imi mos pasiensia ba; hametin imi nia fuan, basa Na’i besik ona atu hiit an mai. ⁹ Keta mura-mura hasouru malu, maun alin sira, atu imi la hetan lia kro’at. Lia na’in hamriik ona iha odamatan. ¹⁰ Maun alin sira, nudar esemplo terus no pasiensia nian, hare ba profeta sira nebe koalia iha Maromak nia naran. ¹¹ Ita hanaran rahun diak sira nebe laran metin. Imi rona oin sa Job laran metin, no imi hare tiha Na’i nia hakarak; oin sa Na’i laran luak no diak. ¹² Maibe, uluk liu, maun alin sira, keta jura, housi lalehan eh housi rai eh housi juramentu naran deit, maibe imi nia “los” mak “los” no imi nia “lae” mak “lae”, atu imi la bele monu ba susar todan. ¹³ Imi ida terus karik? Nia sei resa ba. Imi ida haksolok? Nia sei hananu knananuk hahi nian ba. ¹⁴ Imi ida moras? ¹⁵ Nia sei bolu katuas Kreda nian ba; sira sei resa ba nia, no nia halo sala karik, nia sei hetan perdua. ¹⁶ Ne’e duni, imi konfesa imi nia sala ba malu, no resa ba malu, atu imi hetan isin diak. Ema diak nia orasaun maka’as tebtebes. ¹⁷ Elias hanesan ita; nia resa ho laran manas atu udan la bele tau. Ba tinan tolu no fulan neen, udan la tau duni. ¹⁸ Tuir mai, nia resa atu udan tau, no udan tau duni hodi habokon rai nebe fo nia fuan sira. ¹⁹ Maun alin sira, imi ida la’o sala dalan karik, no imi ida lori nia fila fali ba dalan los, ²⁰ hatene ba katak ema nebe lori ema maksalak ida fali housi nia dalan sala sei soi ema ne’e nia klamar housi mate no hetan perdua ba sala barak.