I  PEDRO

1

                ¹ Pedro, Jesus Kristu nia apostolu ida, ba sarani sira namkari iha Pontus, Galasia, Asia no Bitinia, ² nebe Aman Maromak fihir no Espiritu halo santu atu halo tuir Jesus Kristu no hamos tiha iha nia ran: Grasa no dame sai wa’in iha imi.

Sarani sira nia esperansa

                ³ Kmanek ba Maromak, ita Na’i Jesus Kristu nia Aman. Tan nia laran luak, Nia hafoun ita ba esperansa moris foun nian, housi Jesus Kristu nia moris hi’as housi mate, ⁴ atu simu liman rohan nebe sei la mohu, sei  la foer, sei la lakon, ⁵ maibe rai hela ona iha lalehan be imi nebe Maromak nia kbiit tahan tan imi nia fiar, hadia dau-daun atu mosu iha loron ikus. ⁶ Buat hirak ne’e fo ksolok ba imi maski ohin imi sei hetan susar  oi-oin, ⁷ atu wainhira Jesus Kristu mosu mai, imi nia fiar mos sei mosu nudar soi atu hahi, fo gloria no hawelok tan susar hirak ne’e nebe koko nia, nudar osan mean nebe ema koko ho ahi. ⁸ Imi hadomi Nia, maski imi la hare Nia; maski ohin imi la hare Nia, imi fiar; imi sei haksolok ho ksolok nebe liafuan la to’o atu haktuir. ⁹ Tan fiar ne’e, imi hetan maksoin.

                ¹⁰ Profeta sira nebe koalia kona ba grasa nebe imi sei hetan buka no husu kona ba maksoin ida ne’e. ¹¹ Sira husu sa tempu eh situasaun Kristu nia Espiritu, nebe horik iha sira laran, marka; sira fo hatene nanis Kristu nia terus, no mos nia gloria nebe sei mosu mai. ¹² Maromak fo hatene ba sira katak sira serbi la’os ba sira an rasik maibe ba imi iha buat hirak sira nebe ohin imi simu ona housi sira nebe haklaken liafuan diak ba imi housi Espiritu Santu nebe mai housi lalehan. Buat hirak ne’e anju sira hakarak mana-manas atu hare.

Moris santu

                ¹³ Ne’e duni, fo laran ba, keta lanu ba, tau imi nia esperansa tomak ba grasa nebe sei mosu ba imi wainhira Jesus Kristu mosu mai. ¹⁴ Nudar oan diak, imi keta halo tuir hakarak aat sira nebe imi tuir wainhira imi sei beik, ¹⁵ maibe, nudar Ida nebe bolu imi mak santu, imi mos haka’as an atu sai santu iha imi nia hahalok tomak; ¹⁶ basa hakerek nanis ona, “Ema sei hanaran imi santu, basa Ha’u santu.” ¹⁷ Imi bolu karik nudar Aman ida nebe tesi lia ba ema ida-ida tuir ida-ida nia hahalok, la fihir ema; imi book an ba ho laran tauk iha tempu tomak nebe imi la’o rai. ¹⁸ Imi hatene katak Maromak sosa imi ona housi imi nia hahalok aat sira nebe imi simu housi imi nia bei-ala sira, la’os ho osan mutin eh osan mean nebe bele lakon, ¹⁹ maibe ho Kristu futar ran, nebe folin boot duni: Kristu nudar bibi malae ida nebe la foer, la aat. ²⁰ Maromak tau Nia molok mundu hahu, maibe fo hatene sai deit iha tempu nia rohan, ba imi nia diak. ²¹ Housi Nia, imi la tauk hakbesik Maromak nebe halo Nia moris hi’as housi mate, no fo gloria ba Nia, atu imi tau imi nia fiar no esperansa iha Maromak. ²² Hamos tiha imi nia klamar housi imi nia moris tuir lialos; wainhira imi hadomi imi nia maluk, imi hadomi duni ba ho laran. ²³ Imi moris fali ona, la’os housi musan nebe bele lakon, maibe housi ida nebe la lakon, hodi Maromak nia liafuan nebe moris no horik iha imi; ²⁴ basa “Isin tomak hanesan du’ut, nia kmanek hotu hanesan du’ut nia funan. Du’ut namlaek, no nia funan monu, ²⁵ maibe Maromak nia liafuan hela ba nafatin.” Ne’e mak liafuan diak nebe haklaken tiha ba imi.