2

Kristu mak uma nia fatuk inan

                ¹ Hadook tiha laran aat ba, hakarak atu lohi, laran bosok, laran moras no koalia aat kona ba ema. ² Nudar kosok oan sira nebe foin moris, buka susuben klamar nian, atu imi bele sai boot dau-daun ba maksoin, ³ basa imi koko ona Na’i nia laran luak. ⁴ Hakbesik ba Nia ba; hakbesik ba fatuk moris ne’e nebe ema hewai, maibe kmanek no folin liu iha Maromak futar oin; ⁵ imi mos, nudar fatuk moris, sa’e ba uma espiritu nian, atu sai nudar am’lulik santu sira, hodi hasa’e sakrifisiu espiritu nian nebe monu los ba Maromak nia laran, housi Jesus Kristu. ⁶ Hakerek tiha ona iha Eskritura, “Hare ba, Ha’u sei harii iha Siao fatuk ida, fatuk inan ida nebe kmanek no folin boot; ema nebe fiar iha Nia sei la moe.” ⁷ Ne’e duni, ba imi nebe fiar, Nia kmanek, maibe ba sira nebe la fiar, “Fatuk nebe badaen hewai sai tiha fatuk inan,” ⁸ ho tan, “Fatuk ida nebe sei halo ema sidi, fatuk boot ida nebe sei halo sira monu;” sira sei sidi basa sira la halo tuir liafuan nebe haklaken mos ba sira. ⁹ Maibe imi mak suku ida nebe Maromak hili, imi am’lulik ran liurai sira nian, imi nasaun santu ida, Maromak nia povu rasik, atu imi bele haklaken nia hahalok kmanek. Nia bolu imi housi nakukun laran ba roman nabilan. ¹⁰ Uluk, imi la’os povu ida, maibe ohin imi Maromak nia povu; uluk, imi la simu Maromak nia laran luak, maibe ohin imi simu tiha ona nia.

Hatudu hahalok diak sira

¹¹ Doben sira, ha’u husu ba imi nebe hanesan malae no la’o rai, atu hadook an housi isin nia hakarak aat sira. Sira ne’e halo funu hasouru imi nia klamar. ¹² Hatudu hahalok diak deit iha gentiu sira leet, atu wainhira sira koalia kona ba imi nudar ema aat, sira sei hare imi nia hahalok diak hodi o gloria ba Maromak iha loron nia mosu mai. ¹³ Halo tuir na’i ulun sira ba, liurai boot aas liu, ¹⁴ no mos liurai kiik sira; hare sira hanesan Maromak mak haruka atu fo todan ba sira nebe halo aat no hahi sira nebe halo diak. ¹⁵ Maromak hakarak duni katak imi hatun ema beik sira nia hahalok ho imi nia hahalok diak. ¹⁶ Moris ba hanesan imi rasik nia na’in, maibe keta usa imi nia liberdade atu halo aat; imi moris hanesan Maromak nia atan. ¹⁷ Hamtauk ema tomak ba. Hadomi imi nia maluk ba nudar maun alin. Hamtauk Maromak ba. Hamtauk liurai boot ba. ¹⁸ Atan sira, hamtauk imi nia na’in iha buat hotu, la’os deit ba sira nebe laran diak no laran kmaus, maibe mos ba sira nebe hatodan imi nia moris. ¹⁹ Ne’e mak halo ema folin duni wainhira, hodi hanoin Maromak, nia tahan terus nebe nia hetan maski nia la sala ida. ²⁰ Wainhira imi halo aat, no tan ne’e mak imi hetan todan, ne’e folin sa ida? Maibe wainhira imi halo diak, no tan ne’e mak imi hetan susar, imi tahan nia ho laran hakmatek, Maromak sei hahi imi. ²¹ Basa ba ida ne’e mak Maromak bolu imi; Kristu rasik terus tamba imi, hodi fo esemplu ba imi atu imi mos la’o tuir nia ain-fatin. ²² Nia la halo sala ida, liafuan bosok ida la sai housi nia ibun. ²³ Wainhira ema hasara Nia, Nia la hasara fali; wainhira Nia terus, Nia la si’ak fali; maibe Nia tau laran metin ba Ida nebe tesi lia lo-los. ²⁴ Nia rasik simu ita nia sala iha nia isin iha ai-hun, atu ita bele mate ba sala hodi moris ba moris lo-los. Housi nia kanek sira, imi hetan isin diak. ²⁵ Imi hanesan bibi malae nebe lakon dalan, maibe ohin imi fila fali ona ba imi klamar nia Bibi atan no mahein.