4
Moris tuir Maromak nia hakarak
1
Ne’e duni, tamba Kristu terus iha isin, hametin mos
imi laran ho hanoin ida ne’e, basa ema nebe terus iha isin hadook an tiha housi
sala, 2 atu nia bele moris ba nia moris isin nian
tomak, la’os tan tuir hakarak aat isin nian maibe tan Maromak nia hakarak. 3
Uluk imi halo buat nebe gentiu sira hakarak halo, hodi moris nar-naran
deit, tuir hakarak aat, lanu, ksolok mundu ne’e nian, no adora lulik la hodi
hanoin ukun-fuan sira. Tempu ne’e hotu ona. 4 Ohin
sira hakfodak tamba imi la tuir tan sira nia hahalok aat, no sira hasara imi; 5
maibe sira sei hatan ba Nia nebe sei tesi lia ba ema moris no ema mate. 6
Tan ne’e mak haklaken mos evangeliu ba ema mate sira atu sira nebe ema
tesi lia iha sira nia moris nudar ema--hanesan ema hotu--bele moris iha
espiritu tuir Maromak nia hakarak.
7 Buat
hot-hotu nia rohan besik ona; ne’e duni, imi moris ho oin mos no keta lanu ba
atu imi bele resa. 8 Uluk liu, hadomi malu
teb-tebes, basa domin kasu sala barak. 9 Simu malu
ho laran; 10 imi ida-ida simu kmanek ruma, usa
kmanek ne’e ba maluk sira, nudar atan diak Maromak nia grasa oi-oin nian. 11
Ida nebe koalia, koalia ba nudar ema nebe hato’o Maromak nia liafuan; ema
nebe fo tulun, nudar ema nebe halo nia ho kbiit nebe Maromak fo; atu nune’e,
iha buat hotu ema bele hahi Maromak housi Jesus Kristu. Ba Nia gloria no ukun
tinan ba tinan. Amen.
Halo parte iha Kristu nia terus
12
Doben sira, keta hakfodak kona ba terus boot nebe
mai hasouru imi atu koko imi, hanesan buat ruma nebe oin seluk liu mosu ba imi.
13 Maibe, haksolok ba, basa imi halo parte iha
Kristu nia terus. Wainhira nia kmanek
sei mosu mai, imi bele haksolok liu tan. 14 Rahun
diak ba imi wainhira ema hasara imi tamba Kristu nia naran, basa iha oras neba
Maromak nia Espiritu horik ona iha imi. 15 Hare ba
katak imi ida la terus tamba nia oho ema, ka tamba nia na’okten, ka ema aat, ka
estraga ema seluk. 16 Maibe ema ruma terus karik
tamba nia sarani, nia la bele moe. Nia sei hahi Maromak tan naran ne’e. 17
Basa tempu sei mosu mai wainhira Maromak sei tesi lia iha nia uma-kain
rasik. Wainhira nia hahu ho ita, sira nebe la halo tuir Maromak nia liafuan sei
sai oin sa los? 18
“Susar ba ema diak atu hetan maksoin karik; sei sai oin sa los ba
ema nebe la hatene Maromak no ema maksalak sira? 19 Ne’e
duni, sira nebe terus tuir Maromak nia hakarak halo diak ba no saran sira nia
klamar ba Maromak nebe halo tuir nafatin nia promessa.
|