4

Moris tuir Maromak nia hakarak

                ¹ Ne’e duni, tamba Kristu terus iha isin, hametin mos imi laran ho hanoin ida ne’e, basa ema nebe terus iha isin hadook an tiha housi sala, ² atu nia bele moris ba nia moris isin nian tomak, la’os tan tuir hakarak aat isin nian maibe tan Maromak nia hakarak. ³ Uluk imi halo buat nebe gentiu sira hakarak halo, hodi moris nar-naran deit, tuir hakarak aat, lanu, ksolok mundu ne’e nian, no adora lulik la hodi hanoin ukun-fuan sira. Tempu ne’e hotu ona. ⁴ Ohin sira hakfodak tamba imi la tuir tan sira nia hahalok aat, no sira hasara imi; ⁵ maibe sira sei hatan ba Nia nebe sei tesi lia ba ema moris no ema mate. ⁶ Tan ne’e mak haklaken mos evangeliu ba ema mate sira atu sira nebe ema tesi lia iha sira nia moris nudar ema--hanesan ema hotu--bele moris iha espiritu tuir Maromak nia hakarak.

                ⁷ Buat hot-hotu nia rohan besik ona; ne’e duni, imi moris ho oin mos no keta lanu ba atu imi bele resa. ⁸ Uluk liu, hadomi malu teb-tebes, basa domin kasu sala barak. ⁹ Simu malu ho laran; ¹⁰ imi ida-ida simu kmanek ruma, usa kmanek ne’e ba maluk sira, nudar atan diak Maromak nia grasa oi-oin nian. ¹¹ Ida nebe koalia, koalia ba nudar ema nebe hato’o Maromak nia liafuan; ema nebe fo tulun, nudar ema nebe halo nia ho kbiit nebe Maromak fo; atu nune’e, iha buat hotu ema bele hahi Maromak housi Jesus Kristu. Ba Nia gloria no ukun tinan ba tinan. Amen.

Halo parte iha Kristu nia terus

¹² Doben sira, keta hakfodak kona ba terus boot nebe mai hasouru imi atu koko imi, hanesan buat ruma nebe oin seluk liu mosu ba imi. ¹³ Maibe, haksolok ba, basa imi halo parte iha Kristu nia terus. Wainhira  nia kmanek sei mosu mai, imi bele haksolok liu tan. ¹⁴ Rahun diak ba imi wainhira ema hasara imi tamba Kristu nia naran, basa iha oras neba Maromak nia Espiritu horik ona iha imi. ¹⁵ Hare ba katak imi ida la terus tamba nia oho ema, ka tamba nia na’okten, ka ema aat, ka estraga ema seluk. ¹⁶ Maibe ema ruma terus karik tamba nia sarani, nia la bele moe. Nia sei hahi Maromak tan naran ne’e. ¹⁷ Basa tempu sei mosu mai wainhira Maromak sei tesi lia iha nia uma-kain rasik. Wainhira nia hahu ho ita, sira nebe la halo tuir Maromak nia liafuan sei sai oin sa los? ^{18  “}Susar ba ema diak atu hetan maksoin karik; sei sai oin sa los ba ema nebe la hatene Maromak no ema maksalak sira? ¹⁹ Ne’e duni, sira nebe terus tuir Maromak nia hakarak halo diak ba no saran sira nia klamar ba Maromak nebe halo tuir nafatin nia promessa.