5

Katuas sira nudar bibi atan

                ¹ Ne’e duni, ha’u haka’as imi nia katuas sira, nudar maluk katuas no sasin kona ba Kristu nia terus, nune’e mos tamba halo parte iha gloria nebe sei mosu mai. ² Tau matan ba Maromak nia luhan nebe Nia tau ba imi nia liman, la’os tamba laran todan maibe ho laran haksolok; la’os atu manan buat ruma hodi la moe ida, maibe ho laran kmaan; ³ la’os hodi ukun ho kroat sira nebe iha imi nia liman, maibe hodi sai esemplu ba imi nia luhan. ⁴ Wainhira bibi atan sira nia ulun boot mosu mai, imi sei simu kolen gloria nian ida kmanek liu. ⁵ Nune’e mos, imi foinsa’e sira, haraik an ba imi nia katuas sira. Imi hotu, tau hatais haraik an ba malu nian, basa “Maromak hakribi ema loko an maibe fo grasa ba ema haraik an.” ⁶ Ne’e duni, haraik an ba, iha Maromak kbiit Na’in nia liman, atu iha tempu lo-los Nia sei foti imi. ⁷ Saran  imi nia laran taridu ba Nia, basa Nia hanoin imi. ⁸ Keta lanu ba, maibe matan moris. Imi nia funu-balun, katak, diabu, la’o mai la’o ba hanesan leaun ida, hodi buka atu han ema ruma. ⁹ Tahan nia ba, hodi laran metin ba imi nia fiar; imi hatene katak imi nia maluk sira iha mundu tomak hetan mos terus hanesan imi nian.

                ¹⁰ Liu tiha imi nia terus uitoan ne’e, Maromak grasa hotu nian, nebe bolu imi ba gloria rohan laek iha Kristu, sei hafoun, hametin no fo kbiit ba imi. ¹¹ Ba Nia mak ukun tinan ba tinan. Amen.

                ¹² Ha’u hakerek ba imi surat badak ida ne’e, hodi haka’as imi, no fo hatene ba imi katak buat ne’e mak Maromak nia grasa duni. Tau imi nia laran metin ba nia. Ha’u hakerek ne’e ho Silvano nia tulun. Nia hanesan alin diak ida mai ha’u. ¹³ Feto maluk ida nebe iha Babilonia, nebe mos Maromak hili, haruka nia kumprimentu ba imi.  Nune’e mos ha’u nia oan Marcos. ¹⁴ Kumprimenta hodi rei malu ho domin. Dame ba imi hotu nebe iha Kristu.