2

Matan moris kona ba profeta no mestre bosok sira

                ¹ Maibe profeta bosok sira mos mosu iha ema leet, nudar sei iha mos mestre bosok sira iha imi leet, nebe, sub-subar sei lori mai hanorin aat nebe sei halo aat ema, hodi heli lia ba Mestre nebe sosa sira; nune’e sira halakon lalais sira an. ² No ema barak sei tuir sira nia hahalok aat, no tan sira, ema sei hewai dalan lialos nian. ³ Iha sira nia laran karakten nian, sira sei halo aat imi ho lia bosok; houri uluk kedas lia todan hasouru sira la leet deit, no sira nia rohan aat la dukur hela.

⁴ Basa, Maromak la hanoin karik anju sira nebe la’o sala, maibe soe tun sira ba infernu hodi saran sira ba kuak nakukun nian atu hela iha neba to’o loron tesi lia nian; ⁵ Maromak la hanoin karik ema uluk sira nian, maibe soi deit Noe, justisa nia manu ain, hamutuk ho ema na’in hitu, wainhira Nia halo rai naben ba ema sira nebe la fiar Maromak; ⁶ Maromak halo aat karik rai Sodom ho Gomorra, hodi halo ahi han sira to’o sai ahi-kdesan hotu, hodi halo rai sira ne’e esemplu ida be ema nebe la fiar Maromak, ⁷ no Maromak soi Lot, ema los ida nebe laran susar tebes tamba hahalok ema aat sira nian, ⁸ (basa buat nebe ema los ne’e hare no rona wainhira nia horik iha sira leet halo nia laran susar loron loron iha nia klamar tan sira nia hahalok aat),  ⁹ ne’e duni, Na’i hatene soi ema sira nebe hamtauk Maromak housi babeur, no fo todan ba ema nebe la fiar Maromak to’o loron tesi lia nian, ¹⁰ no liu-liu sira nebe ho laran foer haksolok iha hahalok aat sira no sira nebe la hamtauk na’i ulun sira. Ho loko an no laran tos, sira la tauk atu hasara ema diak sira, ¹¹ maski anju sira, nebe maka’as no kbiit wa’in liu ema, la hateten liafuan ida atu hasara sira iha Na’i futar oin. ¹² Maibe sira ne’e, hanesan balada nebe hanoin la iha, ho sira nia hakarak deit, moris deit atu ema kaer no oho, hodi haksolok iha buat sira nebe sira la hatene, sei lakon hanesan sira ne’e lakon, ¹³ hodi terus aat tamba sira nia hahalok aat. Sira hanoin atu haksolok iha loron. Sira hanesan buat foer no aat, haksolok iha sira nia moris aat, halimar ho imi. ¹⁴ Sira nia matan buka deit sala foer, hamlaha buka sala. Sira babeur ema sira nebe fiar namlele. Sira nia fuan nakonu ho hakarak aat. Sira ne’e oan sira nebe simu ona malisan! ¹⁵ Sira husik ona dalan los; sira la’o dalan sala; sira la’o tuir dalan Balaao, Beor nia oan, nian nebe buka deit manan rikusoi ho hahalok aat; ¹⁶ maibe nia simu lia todan tan nia hahalok; nia hanesan kuda burru beik ida nebe koalia ho ema nia lia hodi tahan profeta nia laran nakali.

¹⁷ Sira ne’e hanesan be matan maran no abu-abu nebe anin maka’as hu’u ba; nakukun boot ida iha rai okos rai hela ona ba sira ne’e. ¹⁸ Basa, hodi gaba an maka’as ho liafuan beik, sira buka, ho hakarak aat ema laran foer nian, atu dada ema nebe foin halai housi sira nebe moris tuir hanorin nebe la los. ¹⁹ Sira hakotu liberdade ba sira ne’e, maibe sira rasik mak laran dodok nia atan. ²⁰ Basa, halai tiha housi mundu nia lia bosok karik, tan hatene ita Na’i no Maksoin, Jesus Kristu, sira monu fali hodi la hetan kbiit; sira nia situasaun ikus nian aat liu fali uluk nian. ²¹ Basa sira ne’e la hatene dalan los nian karik diak liu fali hatene tiha nia, hafoin fila kotuk ba ukunfuan santu nebe sira simu ona. ²² Bei-ala nia liafuan tuir lo-los duni iha sira: “Asu fila fali ba ai-han nebe nia muta tiha, no fahi inan haris deit iha tahu laran.”