3
Na’i sei halo tuir nia promessa
1
Doben sira, ho ida ne’e mak ha’u hakerek ba imi
dala rua ona. Iha surat sira ne’e, ha’u haka’as an atu halo moris liu tan imi
nia matenek nebe la bosok ho ha’u nia liafuan, 2 atu
imi hanoin nafatin liafuan sira nebe profeta santu sira hateten nanis ona no
mos ita Na’i no Maksoin nia ukunfuan nebe apostolu sira hato’o ona ba imi. 3
Imi ten ke hatene katak iha loron ikus ema sira nebe moris deit tuir sira
nia isin nia laran aat sei mosu. 4 Sira ne’e sei
dehan: “Na’i nebe hakotu lia atu hiit an mai fali iha nebe? Houri tempu nebe
ita nia bei-ala sira mate ona, buat hotu hanesan deit wainhira mundu ne’e
hahu.” 5 Maibe sira ne’e hakarak haluha, katak hodi
Maromak nia liafuan, kleur ona mak lalehan sira mosu, no rai sai housi be; no
tan be ida ne’e, 6 mundu iha tempu neba lakon mout. 7 Hodi
Maromak nia liafuan ne’e, lalehan no rai ohin ne’e nian marka tiha ba ahi, to’o
loron justisa nian no tempu nebe Na’i sei halo lakon ema aat sira.
8 Keta
haluha buat ida ne’e: iha Na’i futar oin, loron ida hanesan tinan rihun ida no
tinan rihun ida hanesan loron ida. 9 Na’i la hein
kleur atu halo tuir buat nebe Nia hakotu, nudar ema balun hanoin; maibe Nia
laran diak liu ba imi, hodi lakohi katak ema ida lakon, maibe atu ema hotu bele
hakribi nia sala. 10 Na’i nia loron sei to’o mai
hanesan ahu-na’in ida; iha loron neba lalehan sira sei lakon ho tarutu maka’as,
no ahi sei han lakon rai no buat hotu nebe iha nia.
Hadera an ba
11 Ne’e duni, tan buat hotu ne’e sei lakon, imi
nia moris no imi nia hamtauk Maromak sei sai oin sa los, 12
hodi hein no halo mosu lalais mai Maromak nia loron nia hiit an mai,
wainhira lalehan sira nebe ahi han lakon tiha no ahi han tiha fitun fulan sira
no sei naben? 13 Maibe tuir Na’i nia
promessa, ita hein lalehan foun no rai foun, iha nebe justisa sei hela ba
nafatin.
14 Ne’e duni, doben sira, hodi hein buat sira
ne’e, haka’as an atu moris la foer no sala laek iha Na’i futar oin, iha dame
laran. 15 Imi hare ita Na’i nia laran luak nudar
maksoin ba imi. Ita nia maluk doben, Paulo hakerek ona ba imi tuir matenek nebe
Na’i fo ba nia, 16 hodi hakerek kona ba ida ne’e
nudar nia halo iha surat seluk hotu. Iha surat sira ne’e iha buat sira nebe
susar atu hatene lo-los; nebe ema beik sira no sira nebe fiar namlele hanorin
la los nudar mos sira halo ho eskritura seluk. Sira halakon deit sira an. 17
Ne’e duni, imi nebe hatene ona buat ida ne’e, matan moris ba atu imi nia
laran metin la bele namlele, hafoin husik ema aat nia hanorin la los ne’e lori
lakon imi; 18 maibe sai boot ba iha grasa no
matenek Jesus, ita Na’i no Maksoin; ba Nia gloria ohin no iha loron rohan laek
nian. Amen.
|