2
Kristu, ita nia tulun
1 Ha'u nia kosok
oan sira, ha’u hakerek surat ne’e ba imi, atu imi la bele halo sala; maibe ema
ida halo sala karik, ita iha Ida nebe hamulak iha Aman nia oin tamba ita; ne’e
mak Jesus Kristu, ema diak los. 2 Jesus Kristu
rasik mak buat karan nebe selu ita nia sala; la'os deit ita nia sala sira,
maibe mos ema hot-hotu nia sala.
3 Ita
halo tuir karik Maromak nia ukunfuan sira, ita hatene lo-los katak ita hatene
Nia. 4 Ema ruma dehan karik, “Ha’u hatene Nia,”
maibe la la’o tuir Nia ukunfuan sira; ema ne’e bosokten; lialos la horik ho
nia. 5 Maibe ema ruma halo tuir Na'i nia liafuan
karik, nia hadomi Maromak teb-tebes. Nune'e mak ita hatene katak ita horik iha
Maromak: 6 Ema nebe dehan katak nia horik iha
Maromak sei moris hanesan Maromak rasik.
Ukunfuan foun
7 Ha’u nia doben
sira, ukunfuan nebe ha'u hakerek ba imi la'os buat foun ida; ne’e mak ukunfuan
tuan nebe imi simu ona houri uluk kedas. Ukunfuan tuan ne’e mak lia menon nebe
imi rona tiha ona. 8 Maibe, ohin ha'u hakerek ba
imi ukunfuan foun duni, nebe los duni iha Nia no iha imi, basa nakukun atu liu
ona, no naroman lo-los hahu nabilan ona.
9 Ema
nebe dehan katak nia iha naroman laran, maibe hirus nia maluk, ema ne’e sei
horik iha nakukun laran. 10 Ema nebe hadomi nia
maluk hela iha naroman laran; la iha buat ida iha nia nebe sei lori ema seluk
tan atu halo sala. 11 Maibe ema nebe hirus nia
maluk hela iha nakukun laran; nia la’o iha nakukun laran no nia la hatene nia
ba nebe, basa nakukun halo nia matan delek.
12 Ha’u hakerek ba
imi, ha'u nia kosok oan sira, basa imi nia sala kasu tiha ona tamba Kristu. 13
Ha’u hakerek ba imi, aman sira, basa imi hatene Nia nebe hela houri uluk
kedas. Ha'u hakerek ba imi, foinsa’e sira, basa imi manan tiha ida nebe aat.
14 Ha’u
hakerek ba imi, aman sira, basa imi hatene ida nebe hela houri uluk kedas. Ha'u
hakerek ba imi, foinsa’e sira, basa imi maka’as; no Maromak nia liafuan horik
iha imi, no imi manan tiha ona ida nebe aat.
15 Keta
hadomi mundu ka buat naran deit nebe mundu ne’e nian. Ema nebe hadomi mundu,
Nia la hadomi Aman. 16 Basa buat hotu nebe mundu
ne’e nian--hakarak aat isin nian, hakarak aat matan nian, no loko an moris
nian--buat sira ne’e la mai housi Aman, maibe mai housi mundu ne’e. 17
Mundu ne’e no domin ba nia sei liu dau-daun; maibe ema nebe halo tuir
Maromak nia hakarak sei moris ba nafatin.
Kristu nia funubalun
18 Ha’u
nia oan sira, mundu nia rohan besik ona! Imi rona ona katak Kristu nia
funubalun sei mai; no ohin Kristu nia funubalun barak mosu tiha ona, tan ne’e
mak ita hatene katak mundu ne’e nia rohan besik ona. 19 Lo-los
ema sira ne’e mai housi ita, maibe sira la'os ita nian; sira ita nian karik,
sira sei hela ho ita ba nafatin. Maibe sira ba tiha ona atu ita bele hatene
lo-los katak sira ne’e la’os ita nian.
20 Maibe
imi simu ona mina kose nian housi Espiritu Santu, no imi hotu hatene. 21
Ne’e duni, ha’u hakerek ba imi, la’os tamba imi la hatene lialos, maibe
tamba imi hatene lialos no hatene katak
lia bosok la‘os lialos nian.
22 Ne’e
duni, se mak bosokten? Ne’e mak ema nebe dehan katak Jesus la’os Messias. Ema
ne’e Kristu nia funubalun duni--nia hewai Aman no Oan. 23
Basa ema nebe hewai Oan hewai mos Aman; ema nebe simu Oan simu mos Aman.
24 Ne’e
duni, haka’as an atu laran metin ba lia menon nebe imi rona houri uluk. Imi
laran metin ba lia menon ne’e karik, imi sei moris nafatin iha domin ho Oan no
Aman. 25 Ne’e mak buat nebe Kristu hakotu atu fo
mai ita--moris rohan laek.
26 Ha’u
hakerek ne’e ba imi kona ba sira nebe haka’as an atu lohi imi. 27
Maibe krisma nebe imi simu ona housi Nia hela iha imi, no imi la kuran
atu ema ruma hanorin imi, basa Nia krisma ne’e hanorin imi buat hotu, no buat
nebe nia hanorin mak los, la bosok; nudar Nia hanorin imi, hela iha Nia ba.
28 Tebes duni, ha’u
nia oan sira, hela nafatin iha Nia, atu wainhira Nia mosu mai, ita sei laran
metin hodi la subar housi Nia tan moe iha loron nebe nia mai. Imi hatene katak
Kristu ema los karik; 29 imi hatene mos katak ema
nebe halo buat nebe los moris housi Nia.
|