5

Ita manan mundu ne’e

                ¹ Ema nebe fiar katak Jesus Kristu mak Messias, ema ne’e Maromak nia oan; ema nebe hadomi aman hadomi mos nia oan. ² Nune’e mak ita hatene katak ita hadomi Maromak nia oan sira: wainhira ita hadomi Maromak hodi halo tuir nia ukunfuan sira. ³ Basa ita nia domin ba Maromak mak ne’e: katak ita halo tuir nia ukunfuan sira. Nia ukunfuan la susar mai ita, ⁴ basa ema nebe moris housi Maromak bele manan mundu ne’e. Ita bele manan mundu ne’e ho ita nia fiar. ⁵ Se mak bele manan mundu ne’e? Ema nebe fiar katak Jesus mak Maromak nia Oan, nia deit mak bele manan.

Lia sasin kona ba Jesus Kristu

                ⁶ Jesus Kristu mai ho baptismu be no ran nian. Nia la mai ho be deit, maibe ho be no ran. Espiritu rasik fo sasin katak buat ne’e los duni, basa Espiritu mak lialos. ⁷ Iha sasin tolu: ⁸ Espiritu, be no ran; sira ne’e fo sasin ida deit. ⁹ Ita fiar ema nia lia sasin, maibe Maromak nia lia sasin maka’as liu, no Nia fo lia sasin kona ba nia Oan. ¹⁰ Ne’e duni, ema nebe fiar iha Maromak nia Oan hetan sasin ne’e iha nia rasik  nia fuan; maibe ema nebe la fiar Maromak, ema ne’e halo nia an sai bosokten, basa nia la fiar buat nebe Maromak fo sai kona ba nia Oan. ¹¹ Lia sasin mak ne’e: Maromak haraik tiha mai ita moris rohan laek; moris rohan laek ne’e nia hun mak nia Oan. ¹² Ema nebe hetan Oan, ema ne’e hetan ona moris rohan laek; ema nebe la hetan Maromak nia Oan, ema ne’e la hetan moris.

Moris rohan laek

                ¹³ Ha’u hakerek ne’e ba imi nebe fiar iha Maromak nia Oan, atu imi bele hatene katak imi iha moris rohan laek. ¹⁴ Ita laran metin iha Maromak futar oin, katak wainhira ita husu buat ruma tuir Nia hakarak, Nia rona ita. ¹⁵ Wainhira ita hatene katak Nia rona ita wainhira ita husu, ita hatene katak ita sei simu duni buat nebe ita husu.

                ¹⁶ Imi hare imi nia maluk halo sala nebe la lori ba mate karik, imi sei resa ba Maromak, nebe sei fo moris ba nia. Buat ida ne’e kona ba sira nebe sira nia sala la lori ba mate. Maibe iha sala nebe lori ba mate, no ha’u la dehan katak imi sei resa ba Maromak kona ba ida ne’e. ¹⁷ Hahalok aat hotu sala, maibe iha sala nebe la lori ba mate.

¹⁸ Ita hatene katak ema nebe moris housi Maromak la halo sala, maibe ema nebe moris housi Maromak tahan nia, no ida nebe aat la book nia.

                ¹⁹ Ita hatene katak ita Maromak nian maski mundu tomak sei iha aat na’in nia ukun.

                ²⁰ Ita hatene katak Maromak nia Oan mai tiha ona no fo matenek  ona mai ita, atu ita bele hatene Maromak lo-los. Ita horik ho Maromak lo-los ne’e, hamutuk ho nia Oan Jesus Kristu. Ne’e mak Maromak lo-los, no ida ne’e mak moris rohan laek.

                ²¹ Ha’u nia oan sira, hadook an ba housi lulik sira!