APOKALIPSE

1

                ¹ Ne’e mak buat nebe Maromak hatudu ba Jesus Kristu atu Nia bele fo hatene ba Nia atan sira kona ba buat sira nebe sei mosu lalais; Maromak haruka nia anju atu fo hatene ba nia atan Joao, ² no Joao fo sasin ba Maromak nia liafuan no ba Jesus Kristu nia lia sasin, hodi haktuir buat nebe nia hare. ³ Rahun diak be ema nebe lee lia menon ida ne’e, no rahun diak ba sira nebe rona nia, no halo tuir buat nebe hakerek iha nia, basa tempu to’o ona.

Surat sira ba Kreda iha Asia

                ⁴ Housi Joao, ba kreda hitu Asia nian: grasa no dame ba imi housi Nia nebe iha ohin, uluk no tempu atu mai, housi espiritu hitu nebe hela iha Nia kadunan nia oin, ⁵ no housi Jesus Kristu, sasin nebe laran metin, Oan Mane Boot housi ema mate sira leet, no Liurai liurai sira rai ne’e nian. Ba Nia nebe hadomi ita no hasai tiha ita housi ita nia sala sira ho nia ran, ⁶ no halo ita sai reinu ida, no am’lulik atu serbi nia Maromak no Aman; ba Nia gloria no kbiit wa’in ba nafatin. Amen. ⁷ Nia mak ida nebe sei mai iha kalohan laran; no matan hot-hotu sei hare Nia; sira hotu nebe sona borus Nia, no suku sira hotu iha rai sei tanis tamba nia. Ne’e mak lialos. Amen. ⁸ ”Ha’u mak Alfa no Omega,” Na’i Maromak dehan, Nia nebe iha ohin, uluk no atu mai, Maromak kbiit wa’in.

Visaun hahu

                ⁹ Ha’u nia naran Joao, ha’u mak imi nia maun alin nebe halo parte hamutuk ho imi iha Jesus iha terus, iha reinu, no iha buat hotu nebe imi tahan ho pasiensia. Ha’u hela iha rai kiik Patmos tamba Maromak futar lia no Jesus nia sasin. ¹⁰ Iha loron Na’i nian ida, Espiritu kaer ha’u, no ha’u rona lia ida housi ha’u nia kotuk, nebe hakilar hanesan trombeta ida ¹¹ dehan: “Hakerek buat hotu nebe o hare iha livru ida, no haruka nia ba kreda hitu sira iha Efeso, Esmirna, Pergamo, Tiatira, Sardes, Filadelfia no Laodiseia.”

¹² Wainhira ha’u fila atu hare lia nebe koalia mai ha’u, no wainhira ha’u fila, ha’u hare ahi-oan fatin hitu osan mean nian, ¹³ no iha sira ne’e nia klaran ema ida hanesan Oan Mane, ho hatais unuk naruk nebe kesi metin iha hirus matan ho tali osan mean nian. ¹⁴ Nia ulun no nia fuuk mutin hanesan lana ka neve, nia matan hanesan ahi lakan, ¹⁵ nia ain hanesan besi riti nebe nabilan wainhira hamos tiha ona iha ahi boot nia laran, no nia lia hanesan be barak nia lia. ¹⁶ Iha nia liman kuana, nia kaer dau-daun fitun hitu, surik ho kroat rua sai housi nia ibun, no nia oin hanesan loron nebe lakan ho nia kbiit tomak.

¹⁷ Wainhira ha’u hare nia, ha’u monu hanesan mate iha nia ain, maibe Nia kona ha’u ho Nia liman kuana hodi dehan: “Keta tauk; Ha’u mak uluk no Ha’u mak ikus, no Ida nebe Moris. ¹⁸ Ha’u mate tiha maibe ohin Ha’u moris ona ba nafatin, no Ha’u kaer siabe ba mate no ba matebian sira nia fatin. ¹⁹ Ohin, hakerek buat nebe o hare; buat sira nebe  iha ona no, buat sira nebe atu mosu mai. ²⁰ Kona ba misteriu fitun hitu sira nian nebe o hare iha Ha’u nia liman kuana , no ahi-oan fatin hitu osan mean nian: fitun hitu mak anju sira kreda hitu nian, no ahi-oan fatin sira mak kreda sira rasik.