2

Efeso

¹ ”Ba anju kreda nian iha Efeso hakerek nune’e, ‘Ne’e mak lia menon housi ida nebe kaer fitun hitu sira iha nia liman kuana, nebe ahi-oan fatin hitu osan mean nian hale’u: ² Ha’u hatene buat hotu kona ba o: oin sa los o serbisu maka’as no barak oin sa los o terus ho pasiensia. Ha’u hatene katak o la bele tahan ema aat sira, no oin sa o koko bosokten sira nebe hanaran an apostolu maibe ikus mai hatudu katak sira bosokten. ³ Ha’u hatene mos katak o pasiensia barak, no hetan terus barak tamba Ha’u hodi la hanoin kole. ⁴ Maibe ha’u kesar kona ba ida ne’e: o husik ona o nia domin uluk nian. ⁵ Hanoin di-diak ba o monu housi nebe; hakribi o nia sala ba, no halo hahalok sira nebe o halo uluk. O la halo nune’e karik, o la hakribi karik o nia sala, Ha’u sei mai hodi hasai ahi-oan fatin housi nia fatin. ⁶ Maibe o nia diak mak ne’e: katak o hakribi nudar ha’u hakribi buat nebe ema Nicolaita sira halo. ⁷ Se mak iha tilun, rona ba buat nebe Espiritu dehan ba kreda sira. Ba sira nebe manan, Ha’u sei fo han housi ai-hun moris nian iha Maromak nia paraisu.’”

Esmirna

                ⁸ ”Hakerek ne’e ba anju kreda Esmirna nian, ‘Ne’e mak lia menon housi Ida nebe Uluk no Ikus, nebe mate tiha no moris hi’as fali: ⁹ Ha’u hatene o nia terus no oin sa o kiak tebes, maski o riku, no mos liafuan aat sira housi ema nebe hanaran an Judeu maibe lo-los housi uma-kain Satanas nian. ¹⁰ Keta tauk terus sira nebe sei mosu ba o: diabu sei hatama imi balun ba dadur laran atu koko o, no o sei terus maka’as ba loron sanulu. Laran metin to’o mate ba, no Ha’u sei fo ba o koroa moris nian. ¹¹ Se mak iha tilun, rona ba buat nebe Espiritu dehan ba kreda sira: mate ba dala rua nian la bele halo buat ida ba sira nebe manan.’”

Pergamo

                ¹² ”Hakerek ne’e ba anju Kreda Pergamo nian hodi dehan, ‘Ne’e mak lia menon housi ida nebe kaer surik ho kroat rua: ¹³ Ha’u hatene o horik iha nebe, iha fatin nebe Satanas harii nia kadunan, no katak o laran metin ba Ha’u nia naran no la heli o nia fiar iha Ha’u maski ema oho Ha’u nia sasin diak, Antipas, iha o nia sidade rasik, iha fatin nebe Satanas hela. ¹⁴ Maski nune’e, Ha’u iha buat ruma atu  hato’o ba o ho laran susar: imi balun la’o tuir Balaao nebe hanorin Balak atu tau lasu ba ema Israel sira, atu nune’e sira halo sala foer hodi han aihan nebe saran ona ba lulik sira, no halo sala foer. ¹⁵ Mos iha imi nia leet iha ema sira nebe simu ema Nikolaita sira nia hanorin. ¹⁶ Hakribi o nia sala: lae karik, Ha’u sei mai lalais hasouru o hodi asalta ema sira ne’e ho surik Ha’u nia ibun nian. ¹⁷ Se mak iha tilun, rona ba buat nebe Espiritu dehan ba kreda sira. Ba sira nebe manan Ha’u sei fo mana nebe naksubar no fatuk mutin nebe hakerek tiha naran foun  ida iha nia, nebe ema nebe simu nia deit mak hatene.’”

Tiatira

¹⁸ ”Hakerek ba anju Kreda iha Tiatira hodi dehan, ‘Ne’e mak lia menon Oan Mane nian nebe iha matan hanesan ahi lakan no ain hanesan besi riti nabilan: ¹⁹ Ha’u hatene kona ba o nia domin, o nia fiar, o nia serbisu no o nia terus ho pasiensia, katak o nia hahalok ikus diak liu fali sira uluk nian. ²⁰ Maibe, Ha’u hato’o liafuan ida ne’e ba o: o husik feto naran Isabel nebe hanaran an profeta, no hanorin hodi dada Ha’u nia atan sira atu halo sala foer no han aihan nebe hasa’e ona ba lulik sira. ²¹ Ha’u fo tiha ona ba nia tempu atu hakribi sala, maibe nia lakohi muda nia moris aat ne’e. ²² Ohin, Ha’u sei tau nia iha tobafatin moras nian, no sira nebe halo sala foer ho nia, sira la hakribi sala karik, Ha’u sei saran sira susar boot teb-tebes. ²³ No ha’u sei oho nia oan sira. Nune’e kreda hotu sei hatene katak Ha’u mak koko ema nia fuan no hanoin sira, no fo ba imi ida-ida buat nebe imi nia hahalok sira soi atu simu. ²⁴ Maibe ba imi sira seluk iha Tiatira laran, imi hotu nebe la simu hanorin ne’e ka la hanorin an kona ba Satanas nia misteriu sira, (nune’e mak ema hanaran sira), Ha’u la fo tan knaar ida ba imi; ²⁵ maibe imi kaer metin buat nebe imi iha ona to’o tempu nebe Ha’u to’o ba imi. ²⁶ Ba sira ida manan no kontinua serbisu ba Ha’u to’o rohan, Ha’u sei fo ba nia kbiit atu ukun gentiu sira. ²⁷ Nia sei ukun sira ho fafulu besi nian, hanesan wainhira ema halo fera sana rai sira, nudar Ha’u rasik simu kbiit housi Ha’u Aman. ²⁸ No Ha’u sei fo ba nia Fitun Dader nian. ²⁹ Se mak iha tilun, rona ba buat nebe Espiritu dehan ba kreda sira.’”