4

Maromak saran raiklaran nia futuru ba Bibi Oan

                ¹ Tuir mai, iha ha’u nia visaun, ha’u hare odamatan nakloke ida iha lalehan. Ha’u rona lia uluk nian nebe koalia mai ha’u hanesan trombeta ida, dehan: “Sa’e mai leten ne’e, ha’u sei hatudu ba o buat nebe sei mosu iha futuru.” ² Ho ida ne’e, Espiritu kaer ha’u no ha’u hare kadunan ida hamriik iha lalehan, no Ida nebe tur iha kadunan, ³ no Ida nebe tur iha neba hanesan  jaspe no sardoniu. Arko-iris ida hale’u kadunan ne’e, no ida ne’e hanesan esmeralda. ⁴ Kadunan rua nulu resin haat hale’u kadunan ne’e, no ha’u hare katuas na’in rua nulu resin haat tur iha kadunan sira, hatais unuk mutin ho koroa osan mean nian iha sira nia ulun. ⁵ Rai lakan no rai tarutu mai housi kadunan, no iha kadunan nia oin ahi-oan hitu lakan maka’as, katak Maromak nia Espiritu hitu. ⁶ Iha kadunan no ha’u nia leet iha tasi nebe hanesan vidru, hanesan kristal. Balada haat ho matan barak iha oin no iha kotuk hamriik iha klaran, hale’u kadunan rasik. ⁷ Balada uluk hanesan leaun, ida seluk hanesan karau vaka aman, ida seluk tan ho ema nia oin no ida ikus hanesan manu makikit nebe semu dau-daun. ⁸ Balada ida-ida iha liras neen no matan iha isin lolon tomak, laran no liur; kalan loron sira la para hananu: “Santo, santu, santu, Na’i Maromak kbiit wa’in; nia uluk, ohin no ba nafatin.” ⁹ Wainhira balada sira hanai no hahi no fo agradese ba Ida nebe tur iha kadunan, nebe moris ba nafatin, ¹⁰ katuas rua nulu resin haat taka oin ba rai iha Nia futar oin atu adora Ida nebe moris ba nafatin, hodi soe sira nia koroa iha kadunan nia oin, dehan: ¹¹ “Ita Boot mak ami nia Na’i no ami nia Maromak. Ita Boot soi atu simu gloria, hanai no kbiit, basa Ita Boot hakiak buat hotu no tan deit Ita Boot nia hakarak mak buat hotu mosu no iha.”