5

Maromak nia Bibi Oan

                ¹ Ha’u hare iha Ida nebe tur iha kadunan nia liman kuana, livru ida nebe hakerek iha laran no iha liur. Livru ne’e taka hela ho kadeiadu hitu. ² Tuir mai, ha’u hare anju ida kbiit wa’in liu nebe hakilar ho lia maka’as, “Ema ruma soi atu loke livru hodi halo loke nia kadeiadu sira?” ³ Maibe la iha ema ida iha lalehan ka iha rai ka iha rai okos nebe bele loke livru ne’e ka lee nia. ⁴ Ha’u tanis maka’as basa la iha ema nebe soi atu loke livru ne’e ka lee nia, ⁵ maibe katuas ida dehan mai ha’u, “Keta tanis: Leaun uma-kain Juda nian, David nia Abut, manan tiha ona, no Nia sei loke livru ne’e no halo loke nia kadeiadu hitu.”

                ⁶ Tuir mai, ha’u hare iha kadunan ho balada haat no katuas rua nulu resin haat sira leet, Bibi Oan ida nebe hanesan oho tiha nudar buat karan; Bibi Oan ne’e iha dikur hitu no matan hitu, katak Maromak nia Espiritu hitu nebe haruka tiha ona ba raiklaran tomak. ⁷ Bibi Oan ne’e hakat ba oin atu simu livru housi Ida nebe tur iha kadunan nia liman kuana. ⁸ Wainhira Nia simu tiha livru ne’e, balada haat no katuas rua nulu resin haat tuku tur ba rai iha Nia oin; sira ida-ida kaer harpa no bikan osan mean nian nakonu ho kiarben maran nebe mai housi ema santu sira nia orasaun. ⁹ Sira hananu knananuk foun ida: “Ita Boot soi atu simu livru hodi loke nia kadeiadu, basa ema saran Ita nudar buat karan, no ho Ita Boot nia ran Ita Boot sosa ema sira ba Maromak; housi rasa, lia, povu no nasaun sira hotu, ¹⁰ hodi halo sira sai reinu no am’lulik ba ita nia Maromak no atu ukun raiklaran tomak.”

                ¹¹ Iha ha’u nia visaun, ha’u rona lia housi anju rihun ba rihun nebe halibur an hale’u kadunan no balada sira no katuas sira; sira ne’e rihun ba rihun, hodi hakilar, ¹² ”Bibi Oan nebe saran tiha ona soi atu simu ukun, riku soi, matenek, kbiit, hahi, gloria no bensaun.” ¹³ Tuir mai, ha’u rona buat hotu nebe moris iha lalehan no raiklaran tomak, iha rai okos no iha tasi no buat hotu iha sira laran hodi hakilar: “Ba Ida nebe tur iha kadunan no ba Bibi Oan, hahi, hanai, gloria no kbiit tomak, nafatin ba nafatin.” ¹⁴ No balada haat dehan, “Amen!” no katuas sira tuku tur ba rai atu adora.