6

Bibi Oan halo kotu kadeiadu sira

                ¹ Tuir mai, ha’u hare Bibi Oan loke kadeiadu hitu sira ne’e ida, no ha’u rona balada haat sira ne’e ida hakilar ho lia hanesan rai tarutu nian, “Mai!” ² Kuda mutin ida mosu kedas mai, no ida nebe sa’e nia kaer rama ida; nia simu koroa ema nebe manan nian no nia ba tiha ona, atu la’o housi funu ba funu hodi manan hotu.

                ³ Wainhira Nia loke kadeiadu seluk, ha’u rona balada seluk hakilar, “Mai!” ⁴ No kuda ida seluk mosu mai, mean nabilan, no ida nebe sa’e nia simu tiha knaar ida ne’e: atu hasai dame housi rai no halo ema oho malu. Nia simu surik boot ida.

                ⁵ Wainhira ba dala tolu ona, Nia loke kadeiadu seluk tan, ha’u hare balada seluk tan hakilar, “Mai!” Kuda metan ida mosu kedas mai, no ida nebe sa’e nia kaer balanse ida; no ha’u rona lia ida hakilar hanesan housi balada haat sira leet hodi dehan, ⁶ ”Trigu sasukat ida nian nudar loron ida nia serbisu nia folin, no sasukat tolu sebada nian nudar loron ida nia serbisu nia folin, maibe keta halo aat ba mina no tua.”

                ⁷ Wainhira ba dala haat, Nia loke kadeiadu ida tan, ha’u rona lia balada haat sira ne’e ida hodi hakilar, “Mai!” Kuda ida tan mosu kedas, kamutis hanesan mate, no ida nebe sa’e nia hanaran an Mate, no inferno tuir nia. ⁸ Sira simu kbiit ba raiklaran nia balun haat ida, atu oho ho surik, ho hamlaha, ho moras no ho balada fuik rai nian.

                ⁹ Wainhira ba dala lima, Nia loke kadeiadu, ha’u hare iha altar nia okos mate klamar sira nebe ema oho tamba sira fo sasin ba Maromak nia liafuan. Sira hakilar maka’as, ¹⁰ ”Santu, Na’i laran los, to’o wainhira mak Ita Boot sei hein molok atu tesi lia no fo kastigu tan ami nia ran ba ema raiklaran sira?” ¹¹ Sira ida-ida simu tiha unuk mutin, no ema haruka sira atu hein uitoan tan ho pasiensia, to’o tempu numeru sira nia maluk atan no maun alin sira nian los ona, sira nebe ema sei oho hanesan sira.

                ¹² Iha ha’u nia visaun, wainhira ba dala neen, Nia loke kadeiadu ida, rai nakdoko maka’as no loron sai metan hanesan hena karon nian; fulan tomak sai mean hanesan ran, ¹³ no fitun housi lalehan sira monu ba rai hanesan ai figueira nia fuan sira monu housi ai figueira nian wainhira anin maka’as book nia; ¹⁴ lalehan lakon hanesan biti nebe lulun tiha no foho sira hotu no rai kiik sira doko sai tiha housi sira nia fatin. ¹⁵ Tuir mai, liurai sira hotu rai ne’e nian, gubernador sira no komandante sira, ema riku sira no ema boot sira, ema hot-hotu, atan no la’os atan, halai ba foho atu subar iha rai kuak sira no iha fatuk sira leet. ¹⁶ Sira dehan ba foho no fatuk sira, “Monu ba ami nia leten ba, no subar ami housi Ida nebe tur iha kadunan no housi Bibi Oan nia laran nakali; ¹⁷ basa loron boot nia laran nakali nian mai tiha ona, no ema se bele tahan nia?”