7

Sira nebe simu sinal housi uma-kain Israel nian

                ¹ Tuir mai, ha’u hare anju na’in haat nebe hamriik iha rai ne’e nia sikun haat, hodi kaer anin haat raiklaran nian atu la bele hu’u ba rai ka ba tasi ka ba ai-hun sira. ² Hafoin, ha’u hare anju ida tan sa’e  housi lorosa’e, hodi lori sinal Maromak moris nian; nia bolu ho lia maka’as ba anju na’in haat nebe simu tiha knaar atu halo aat ba rai no tasi, “Keta halo aat lai ba rai ka ba tasi ka ba ai-hun sira, molok ami tau sinal iha Maromak nia atan sira nia rentos.” ⁴ Tuir mai, ha’u rona ema na’in hira mak sei simu sinal: rihun atus ida haat nulu resin haat, housi uma-kain sira hotu Israel ninian: ⁵ housi uma-kain Juda, rihun sanulu resin rua; housi uma-kain Rubem, rihun sanulu resin rua; housi uma-kain Gad, rihun sanulu resin rua;  ⁶ housi uma-kain Aser, rihun sanulu resin rua; housi uma-kain Neftali, rihun sanulu resin rua;  housi uma-kain Manasses, rihun sanulu resin rua;  ⁷ housi uma-kain Simeao, rihun sanulu resin rua;  housi uma-kain Levi, rihun sanulu resin rua;  housi uma-kain Issacar, rihun sanulu resin rua; ⁸ housi uma-kain Zabulaun, rihun sanulu resin rua;  housi uma-kain Jose, rihun sanulu resin rua;  housi uma-kain Benjamim, rihun sanulu resin rua.

Santu  sira nia premiu

                ⁹ Ne’e hotu tiha, ha’u hare ema lubun boot ida, sura la bele, housi nasaun , rasa, uma-kain no lia hot-hotu; sira hamriik iha kadunan no Bibi Oan sira nia oin, hatais ho unuk mutin hodi kaer ai-tahan iha sira nia liman. ¹⁰ Sira hakilar maka’as, “Maksoin mai housi ita nia Maromak nebe tur iha kadunan, no mos  housi Bibi Oan!” ¹¹ No anju sira hotu nebe hamriik hale’u kadunan ne’e, hale’u katuas sira no balada haat sira, no sira ne’e tuku tur ba rai iha kadunan nia oin, hodi kona rai ho sira nia rentos, no adora Maromak ho liafuan sira ne’e, ¹² ”Amen, lia hahi nian no gloria no matenek no agradese no naran boot no ukun no kbiit ba ita nia Maromak nafatin ba nafatin. Amen.”

¹³ Tuir mai, katuas sira ida koalia hodi husu ha’u, “Ita boot hatene sira nebe hatais mutin ne’e se, no sira mai housi los nebe?” ¹⁴ Ha’u hatan ba nia, “Na’i, ita boot mak hatene.” Hafoin nia dehan, “Sira mak sira nebe terus maka’as, no fase mutin fali ona sira nia hatais iha Bibi Oan nia ran.  ¹⁵ Sira ne’e hamriik ohin iha Maromak nia kadunan nia oin hodi serbi Nia kalan loron iha nia santuariu; no Ida nebe tur iha kadunan sei  tau matan  ba sira nia iha Nia oin. ¹⁶ Sira ne’e sei la hamlaha ka hamrook tan; loron ka anin manas sei la halo sira terus tan, ¹⁷ basa Bibi Oan nebe tur iha kadunan sei sai sira nia Bibi Aten no Nia sei lori sira ba be matan be moris nian; no Maromak sei hamaran sira nia mataben.”