8

Kadeiadu ikus

                ¹ Tuir mai, Bibi Oan loke kadeiadu ikus, no lalehan tomak nonok deit ba meia ora. ² Tuir mai, ha’u hare anju na’in hitu nebe hamriik iha Maromak futar oin no trombeta hitu nebe atu fo ba sira. ³ Anju seluk tan, nebe kaer dau-daun insensariu osan mean nian, hakat mai hodi hamriik iha altar oin. Ema fo insensu barak  los ba nia atu hasa’e hamutuk ho santu sira nia orasaun iha altar osan mean nian nebe hamriik iha kadunan nia oin; ⁴ nune’e, housi anju nia liman suar insensu nian sa’e to’o ba Maromak futar oin no hamutuk ho insensu ne’e santu sira nia orasaun. ⁵ Anju kaer insensariu no hakonu nia ho ahi housi altar, hafoin nia soi insensariu ba rai. Rai lakan no rai tarutu kedas, no rai nakdoko liu.

Trombeta haat uluk nian

                ⁶ Anju na’in hitu sira ho trombeta hitu hadia an atu halia trombeta sira.  ⁷ Anju ida uluk hu’u nia trombeta, no ho ida ne’e, be fatuk malirin no ahi kahur ho ran monu ba rai; ahi han rai nia balun tolu ida, ai-hun sira hotu nia balun tolu ida no du’ut tahan hot-hotu.

⁸ Anju ida tan hu’u nia trombeta, no buat ida nebe hanesan foho boot nebe lakan ho ahi monu ba tasi laran; tasi nia balun tolu ida nakfila ba ran, buat hotu nebe moris iha tasi laran nia balun tolu ida mate hotu, no ro hotu nia balun tolu ida sai aat.

¹⁰ Wainhira ba dala tolu, anju ida tan hu’u nia trombeta, fitun boot ida monu housi lalehan, lakan hanesan bola ahi nian, no nia monu ba mota no be matan sira hotu nia balun tolu ida; ¹¹ ema hanaran fitun ne’e absintu, no be sira hotu nia balun tolu ida sai moruk hanesan absintu, no ema barak mate wainhira sira hemu nia.

¹² Wainhira ba dala haat, anju ida tan hu’u nia trombeta, loron nia balun tolu ida no fulun nia balun tolu ida, no fitun sira nia balun tolu ida rahun tiha, nune’e naroman nia balun tolu ida lakon no ba loron ida nia balun tolu ida hela iha nakukun laran, no nune’e mos ho kalan.

                ¹³ Iha ha’u nia visaun, ha’u rona manu makikit ida nebe semu aas liu hodi hakilar ho lia maka’as, “Susar, susar, susar, ba ema hot-hotu iha rai wainhira ema rona trombeta tolu seluk nebe anju sira atu hu’u.”