9

Gafaniotu housi matebian sira nia fatin

                ¹ Tuir mai, ba dala lima, anju ida tan hu’u nia trombeta, no ha’u hare fitun ida nebe monu ba rai housi lalehan, no nia simu siabe ba rai kuak ida nebe lori ba matebian sira nia fatin. ² Wainhira nia loke matebian sira nia fatin, ahi suar sai housi fatin ne’e hanesan suar housi fugaun boot, nune’e loron no lalehan sai nakukun, ³ no housi suar laran gafaniotu barak mosu nebe simu tiha kbiit hanesan sakunar sira iha rai; ⁴ sira la bele halo aat to’os ka natar ka ai-hun sira; sira la bele halo aat ba sira nebe simu tiha sinal iha sira nia rentos. ⁵ Sira la bele oho sira ne’e, maibe sira bele fo moras ba sira ba fulan lima, no moras ne’e sei sai hanesan sakunar tata nia moras. ⁶ Wainhira ida ne’e mosu, ema sei hakarak mate maibe sei la hetan nia iha fatin hot-hotu; sira sei hakarak mate maibe mate sei halai housi sira.

⁷ Wainhira ema hare sira, gafaniotu sira ne’e hanesan kuda nebe hatais ba funu; iha sira nia ulun iha buat ruma nebe hanesan koroa osan mean nian; sira nia oin hanesan ema nian, ⁸ no sira nia fuuk hanesan feto sira nian, no sira nia nehan hanesan leaun sira nia nehan. ⁹ Sira nia isin lolon taka metin ho besi funu nian, no sira iha kulit ikan nian hanesan besi nebe taka hirus matan, no sira lira nia tarutu hanesan kuda kareta barak nia tarutu nebe halai maka’as ba funu hamutuk ho kuda sira. ¹⁰ Sira nia ikun hanesan sakunar nian, no iha sira nia ikun, sira bele halo ema hetan moras ba fulan lima. ¹¹ Nudar liurai nebe ukun sira mak anju rai kuak nian ida nebe klean teb-tebes sukat la bele; iha lia Ebreu, nia naran mak Abaddon, no iha lia gregu Apoliao.

¹² Susar uluk liu tiha; maibe, hare ba susar rua tan sei mai.

¹³ Wainhira ba dala neen, anju ida hu’u nia trombeta, ha’u rona lia ida mai housi dikur haat iha altar osan mean nian nebe hela iha Maromak  futar oin. ¹⁴ Lia ne’e dehan ba anju nebe hu’u nia trombeta: “Kore tiha anju haat nebe kesi hela iha mota boot  Eufrates nian.” ¹⁵ Ne’e duni, sira kore anju haat ne’e. Anju sira ne’e pronto ona ba oras, loron, fulan no tinan nebe sira sei oho ema tomak nia balun tolu ida. ¹⁶ Soldadu nebe sa’e kuda nia numeru mak miliaun rua; ha’u rona sira nia numeru.

¹⁷ Iha ha’u nia visaun ha’u hare kuda sira  nune’e: ida nebe sa’e kuda hatais besi hirus matan nian mean, asul no kinur hanesan ahi hamutuk ho ensofre, no kuda sira nia ulun hanesan leaun nian, no ahi no suar sai housi sira nia ibun. ¹⁸ Ho buat tolu ne’e, ahi, suar no ensofre ema tomak nia balun tolu ida mate. ¹⁹ Basa, buat tolu ne’e sira nia kbiit mai housi kuda sira nia ibun no sira nia ikun. Sira nia ikun hanesan samea ho ulun nebe bele hakanek.

²⁰ Ema sira seluk nebe la mate tan susar sira ne’e la hakribi sira nia liman nia hahalok, ka husik adora diabu no lulik sira housi osan mean, osan mutin, besi riti, fatuk no ai, nebe la bele hare ka rona ka la’o. ²¹ Sira la hakribi sira nia sala oho ema nian ka halo lulik oi-oin, ka sala foer ka na’ok.