11
Sasinm
na’in rua
1 Tuir mai, ema fo fafulu
naruk ida atu sukat, hodi dehan, “Ba, sukat Maromak nia santuariu, ho altar no
ema sira nebe adora iha neba, maibe husik fatin iha liur no keta sukat nia basa
fatin ne’e saran ona ba gentiu sira. Sira sei sama sidade santa ba fulan haat
nulu resin rua. 2 Maibe ha’u sei haruka ha’u nia
sasin na’in rua atu halo profesia ba loron rihun ida atus rua neen nulu; sira
sei hatais karon nian. 3 Sira ne’e mak ai oliveira
rua no ahi-oan rua nebe hela iha raiklaran nia Na’i nia oin. 4
Wainhira ema buka atu halo aat sira, ahi bele sai housi sira nia ibun
hodi han funubalun sira. 5 Ema ruma buka atu halo
aat sira karik, nia sei mate duni hanesan ne’e. 6 Sira
bele taka lalehan atu nune’e udan la tau wainhira sira halo profesia. Sira bele
halo be nakfila ba ran hodi halo aat raiklaran ne’e ho susar naran deit
wainhira sira hakarak. 7 Wainhira sira fo sasin
tiha ona, balada nebe mai housi rai klean boot sei halo funu hasouru sira no sei
manan sira no oho sira. 8 Sira nia isin mate sei
toba iha dalan boot sidade boot nian nebe ema hanaran Sodoma no Egiptu, iha
nebe ema hedi tiha iha krus sira nia Na’i krus. 9 Ba
loron tolu ho balun, ema housi povu, rasa, lia no nasaun hotu sei hateke ba
sira nia isin mate, hodi la husik ema hakoi nia, 10 no
ema sira housi raiklaran sei haksolok tan sira hodi selebra buat ne’e; sira sei
fo presente ba malu, basa profeta rua ne’e fo susar ba povu raiklaran nian.
11 Liu tiha loron tolu ho
balun, Maromak hu’u iis moris nian ba sira. Sira hamriik no sira hotu nebe hare
buat nebe mosu tauk teb-tebes. 12 Tuir mai sira
rona lia maka’as housi lalehan nebe dehan ba sira, “Sa’e mai iha ne’e!” Sira
nia funubalun sira sei hateke hela, sira sa’e ba lalehan iha kalohan ida nia
laran. 13 Rai nakdoko maka’as kedas no sidade nia
sorin sanulu ida monu; ema rihun hitu mate iha rai nakdoko nia laran; sira nebe
hela tauk teb-tebes; sira hahi Maromak lalehan nian.
Ba
dala hitu trombeta lia
14 Ne’e mak susar ba dala
rua. Susar ba dala tolu sei tuir mai lalais.
15
Tuir
mai ba dala hitu, anju ida tan halia nia trombeta. Ema iha lalehan rona lia barak
nebe hakilar hodi dehan, “Reinu raiklaran nakfila tiha ba reinu Na’i no nia
Kristu nian, no Nia sei ukun ba nafatin.” 16 Katuas
rua nulu resin haat nebe tur iha Maromak futar oin, monu ain ba rai, kona rai
ho sira nia rentos hodi adora Maromak 17 ho liafuan
sira ne’e: “Ami fo agradese ba Ita Boot, Na’i Maromak kbiit Na’in, Nia nebe
ohin no Nia nebe uluk, basa Ita Boot hatudu Ita Boot nia kbiit maka’as no hahu
ita nia ukun. 18 Nasaun sira laran nakali teb-tebes,
maibe Ita Boot rasik laran nakali mosu mai. Tempu to’o ona atu tesi lia ba
matebian sira no fo premiu ba Ita Boot nia atan, profeta no santu sira no ba
sira hotu nebe, kiik ka boot, tauk Ita Boot nia naran. Tempu to’o ona atu halo
aat sira hotu nebe halo aat raiklaran ne’e.”
19 Tuir mai Maromak nia
santuariu nakloke iha lalehan. Ema bele hare arka aliansa nian iha nia laran.
Rai lakan, lia maka’as, rai tarutu, rai nakdoko no be fatuk malirin monu housi
lalehan.
|