12

Visaun kona ba feto no samea nian

                ¹ Sinal boot ida mosu iha lalehan: feto ida nebe hafutar an ho loron, hamriik iha fulan nia leten. Fitun sanulu resin rua hale’u nia ulun hanesan koroa ida. ² Nia isin rua no atu tur ahi ona, hodi hakilar tan susar tur ahi nian. ³ Tuir mai, sinal ida seluk mosu iha lalehan: samea mean boot ida ho ulun hitu no dikur sanulu; ulun fitu ida-ida ho koroa kiik ida. ⁴ Nia ikun dasa fitun sira nia sorin tolu ida hodi hatun sira ba rai, no samea ne’e hamriik iha feto nia oin wainhira nia atu tur ahi ona, atu nia bele han nia oan wainhira nia hahoris ona. ⁵ Feto ne’e hahoris oan mane ida ba raiklaran, oan mane nebe atu ukun nasaun sira hotu ho oe besi nian, no ema lori sa’e kedas oan ne’e ba Maromak no ba nia kadunan, no feto halai ba rai fuik maran, iha nebe Maromak hadia tiha fatin diak ba nia atu ema hare di-diak nia ba loron rihun ida atus rua neen nulu.

⁷ Funu hahu iha lalehan, wainhira Miguel ho nia anju sira asalta samea. Samea ne’e hafunu fali hamutuk ho nia anju sira, ⁸ maibe sira lakon no la iha ona fatin ba sira iha lalehan. ⁹ Maromak duni tun ba rai samea boot, samea uluk nian, nebe ema hanaran diabu eh Satanas, nebe bosok raiklaran tomak, no nia anju sira nebe hamutuk ho nia. ¹⁰ Tuir mai, ha’u rona lia ida housi lalehan hakilar, “Maksoin, kbiit no reinu Maromak nian no Kristu nia ukun mai tiha ona, tamba nia funubalun nebe kesar ita nia maun alin kalan loron iha Maromak futar oin lakon tiha. ¹¹ Sira manan nia hodi Bibi Oan nia ran no ho sira nia liafuan sasin nian, basa sira la tauk mate tan hadomi sira nia moris. ¹² Ne’e duni, lalehan haksolok ba, no sira hotu nebe horik iha nia. Maibe susar ba imi, rai no tasi; basa diabu tun tiha ba imi ho laran nakali, tamba nia hatene katak nia loron sira to’o ona rohan.”

                ¹³ Wainhira samea hare katak Maromak duni nia ona ba rai, nia halai tuir feto ne’e nebe hahoris oan mane. ¹⁴ Maibe feto ne’e simu manu makikit nia liras rua atu bele semu dook housi samea  ba rai fuik maran, iha nebe ema sei tau matan di-diak ba nia ba tinan ida no tinan rua no tinan balun ida. ¹⁵ Ne’e duni samea halo be suli maka’as housi nia ibun hanesan mota ida, tuir feto atu lori nia iha be laran. ¹⁶ Maibe rai tulun feto ne’e; nia loke nia ibun hodi tolan mota nebe mai housi samea nia ibun. ¹⁷ Tuir mai, samea laran nakali hasouru feto ne’e no nia ba halo funu hasouru feto ne’e nia oan sira seluk,  sira hotu nebe halo tuir Maromak nia ukunfuan no fo sasin ba Jesus.

                ¹⁸ Ha’u hamriik iha tasi ibun.