6

Fo esmola oin sa

^1“ Imi keta halo buat diak iha ema sira oin atu sira hare imi. Halo nune'e karik, imi sei la simu imi nia kolen housi imi nia Aman nebe iha Lalehan. ² Ne'e duni, wainhira o fo esmola, keta husik ema hu’u karau dikur iha o nia oin, hanesan ema laran makerek sira halo iha sinagoga ka iha luron sira, atu ema hahi sira. Ha'u dehan lialos ba imi, sira simu ona sira nia kolen. ³ Maibe, wainhira o fo esmola, o nia liman karuk la bele hatene sa ida mak o nia liman los halo, ⁴ atu ema ida la bele hatene o nia esmola, no o nia Aman nebe hare buat subar, sei fo kolen ba o.”

Harohan oin sa

                ⁵ “Wainhira imi halo orasaun, keta halo hanesan ema laran makerek sira, nebe gosta harohan hodi hamriik iha sinagoga sira. Tebes, Ha'u dehan ba imi, sira simu ona sira nia kolen. ⁶ Maibe, wainhira o harohan, tama iha o nia kuartu laran, taka odamatan hodi resa sumik ba o nia Aman, basa Nia nebe hare buat sumik, sei fo kolen ba o. ⁷ Iha imi nia orasaun, keta koalia barak hanesan gentiu sira; basa sira hanoin katak, ho sira nia liafuan bara-barak, Na’i sei rona sira. ⁸ Imi keta halo hanesan sira, basa imi nia Aman hatene buat nebe imi kuran molok imi husu ba Nia. ⁹ Ne'e duni, imi sei harohan nune'e: ‘Ami Aman iha lalehan, tulun ami atu hahi Ita naran. ¹⁰ Halo ita nia reinu to'o mai ami; tulun ami halo tuir Ita nia hakarak iha rai nudar iha lalehan. ¹¹ Haraik aihan lor-loron nian mai ami. ¹² Haraik perdua ba ami nia sala, nudar ami perdua sira nebe halo aat ami. ¹³ Keta husik ami monu ba tentasaun, maibe hasai ami housi buat aat.

                ¹⁴ Basa imi perdua karik ema sira nia sala, imi Aman iha lalehan mos sei perdua imi nia sala sira. ¹⁵ Maibe imi la perdua karik ema sira nia sala, imi nia Aman mos sei la perdua imi nia sala sira.”

Hadera an oin sa

¹⁶ “Wainhira imi hadera an, keta hatudu oin sin, hanesan ema laran makerek sira, nebe halo sira oin aat atu ema hare katak sira hadera an. Tebes, Ha'u dehan ba imi katak ema sira ne'e simu tiha ona sira nia kolen. ¹⁷ Maibe, wainhira o hadera an, tau mina morin ba o ulun, fase oin, ¹⁸ atu ema la bele hatene katak o hadera an; o nia Aman nebe subar hela mak hatene; nune'e o nia Aman, nebe hare housi nia subar fatin, sei fo kolen ba o.”

Maromak no rikusoi

                ¹⁹ “Imi keta halot hamutuk murak iha rai, nebe meak ho ular han mohu no na'okten sira sobu lutu hodi na'ok. ²⁰ Maibe imi halibur murak iha lalehan, iha nebe ular no meak la hamohu sira, na'okten sira mos la sobu lutu hodi na'ok. ²¹ Basa iha fatin nebe o tau o nia murak, o nia fuan sei hela mos iha neba. ²² O nia isin nia ahi-oan mak o nia matan; o nia matan diak karik, o nia isin tomak sei nabilan. ²³ Maibe o nia matan aat karik, o nia isin tomak sei iha nakukun hela. Ne'e duni, roman iha o sai nakukun karik, nakukun ne'e sei sai boot duni! ²⁴ Ema ida la bele serbi ba Na’i ulun rua, basa nia sei rai odi hasouru ida hodi hadomi ida seluk, ka nia sei serbi ida hodi hakribi ida seluk. Imi la bele serbi hamutuk Maromak no osan.”

Maromak tau matan

                ²⁵ “Tan ne'e Ha'u dehan ba imi: keta hanoin resin kona ba imi nia moris, atu han sa ida; ka ba imi nia isin lolon, atu hatais sa ida. ²⁶ Imi hare ba manu sira lalehan: sira la kuda, la kari, la halot iha hoka; no imi nia Aman iha lalehan fo han sira. Imi la folin liu sira?  ²⁷ Imi ida nebe mak hodi hanoin barak, bele hanaruk nia moris sasukat ida tan?”

                ²⁸ “Tan sa imi hanoin resin kona ba hatais? Imi hare ai-funan liriu sira nebe moris iha rai. Sira la serbisu, la teik. ²⁹ Maibe, Ha'u dehan ba imi katak Salomao mos iha nia kmanek wa’in tomak la hatais hanesan sira ne'e ida. ³⁰ Ne'e duni, Maromak fo hatais karik hanesan ne'e ba du’ut rai nian nebe ohin iha no aban soe ba ahi, Nia sei la halo liu tan fali ba imi, ema nebe fiar namlele?”

                ³¹ “Ne'e duni, imi keta laran susar hodi dehan: Ita sei han ka hemu, ka hatais los sa ida? ³² Gentiu sira buka buat ne'e sira hotu. Maibe imi nia Aman hatene katak imi kuran buat sira ne'e hotu. ³³ Imi buka uluk knanain Maromak nia reinu ho nia justisa; buat sira seluk sei fo liu tan ba imi. ³⁴ Ne'e duni imi keta hanoin barak kona ba aban, basa sei hetan nia rasik nia susar. Ba loron ida-ida to’o ona ho nia rasik nia serbisu.”